Kaspii teńizi aimaǵyndaǵy áriptestikke qashan jan bitedi?
"Dostyq pen áriptestik: Kaspii mańy aimaǵyndaǵy memleketaralyq bailanysqa qashan jandanady?" degen taqyryp aiasynda ótken otyrystyń shymyldyǵyn saiasattanýshy Edýard Poletaev túrdi.
Onyń aitýynsha, biylǵy jyly Astanada Kaspii mańy aimaǵynyń taǵdyry aiqyndalatyn tarihi 5-shi sammit ótedi dep josparlanyp otyr. Osy sharada Kaspii aimaǵynyń ekonomikasyna jáne qaýipsizdigine qajetti Konventsiia qabyldanbaq.
Óz kezeginde tarihshy Asqar Nursha bul aimaqtyń áli de "uiqyda" jatqanyn tilge tiek etti. Onyń aitýynsha, bul jaǵdai AQSh biligine Tramp kelgesin ózgerýi múmkin. "Aq Úi Kaspii aimaǵynda Resei men Irannyń áskeri qatysýy qanshalyqty zańdy?" degen saýaldy ortaǵa tastaýy ǵajap emes" deidi ol.
Budan keiin sóz alǵan ǵalym Lidiia Parhomchik: "Kaspiige qatysty kelissózderdiń júrip jatqanyna sonaý 1996 jyldan beri esepteseńiz 20 jyldan astam ýaqyt ótipti. Óz basym Qazaqstanda ótetin kezdesý qandai da bir máseleni sheshedi dep oilamaimyn. Sebebi aldaǵy sammit óz aldyna óte úlken mindetter qoiyp otyr. Ol Konventsiia qabyldap, osy qujatqa qol qoiý. Osy ýaqytqa deiin ótkizilgen sammitterdiń birde-birinde mundai maqsat qoiylmaǵan" dedi.
Saiasattanýshy Zámir Qarajanov óz kezeginde tarihshy Asqar Nurshanyń pikirin tolyqtyra ketti. Onyń aitýynsha, Kaspii aimaǵynda Resei men Iran flotynyń bolýy aimaqtaǵy memleketterdiń bir-birine degen senimin kórsetedi.
"Ókinishtisi, osy senim saýda-sattyqqa ulaspai otyr. Kaspii mańyndaǵy elderdiń barlyǵy munai-gaz óndiretin memleketter. Sol sebepti bular ózara taýar almasa almaidy. Aldaǵy ýaqytta osy máseleniń túiinin tarqatatyn, aimaqtaǵy memleketterdiń alys-beris, barys-kelisin kúsheitetin sharalardy qolǵa alǵan jón" dedi ol.
