Qazaqstan áskeri qyzmetshileri Kaspii teńiziniń bir bóligin minadan tazartý jumystaryn júrgizedi. Bul aýmaq arqyly «Qalamqas-teńiz» jáne «Hazar» jobalary aiasynda sýasty munai qubyrlaryn tartý josparlanyp otyr, dep habarlaidy dalanews.kz.
Tiisti aqparat 25 qyrkúiekke deiin qoǵamdyq talqylaýǵa shyǵarylǵan Salyq kodeksine engiziletin túzetýler jobasynda jariialandy. Qujatqa sáikes, Qorǵanys ministrligi Kaspii teńiziniń qazaqstandyq sektoryndaǵy №200 aýdandy minadan tazartýy tiis. Josparlanǵan sýasty munai qubyrlary dál osy aýmaq arqyly ótedi.
Joba mátininde Qorǵanys ministrligi «Qalamqas-teńiz» jáne «Hazar» investitsiialyq jobalaryna arnalǵan sýasty munai qubyrlarynyń baǵyty ótetin teńiz aýdanynda minasyzdandyrý jumystaryn júrgizetini kórsetilgen. Munda tek teńiz túbin zertteý jumystary ǵana emes, sýastyndaǵy izdestirý-qutqarý jáne jarylys-tehnikalyq operatsiialar da atqarylady.
Arnaiy jabdyqty joba operatory satyp alady
Mundai jumystarǵa daiyndyq buǵan deiin bastalǵan. 2025 jyldyń mamyrynda Qorǵanys ministrligi, Energetika ministrligi jáne Kalamkas-Khazar Operating kompaniiasy yntymaqtastyq týraly memorandýmǵa qol qoiǵan. Qujatqa sáikes, minasyzdandyrýǵa qajetti arnaiy jabdyqty joba operatory satyp alady. Keiin bul qural-jabdyqtar Qazaqstan Qorǵanys ministrliginiń menshigine beriledi.
Sondai-aq zań jobasynyń túsindirme jazbasynda salyqtyq máseleler de qarastyrylǵan. Onda Qorǵanys ministrligi júrgizetin sýasty izdestirý jáne jarylys-tehnikalyq jumystardyń nátijesinde Kalamkas-Khazar Operating kompaniiasynda korporativtik tabys salyǵy men jer qoinaýyn paidalanýǵa salynatyn balamaly salyqty esepteý úshin tabys týyndamaityny atap ótilgen.
