Қазақстан әскери қызметшілері Каспий теңізінің бір бөлігін минадан тазарту жұмыстарын жүргізеді. Бұл аумақ арқылы «Қаламқас-теңіз» және «Хазар» жобалары аясында суасты мұнай құбырларын тарту жоспарланып отыр, деп хабарлайды dalanews.kz.
Тиісті ақпарат 25 қыркүйекке дейін қоғамдық талқылауға шығарылған Салық кодексіне енгізілетін түзетулер жобасында жарияланды. Құжатқа сәйкес, Қорғаныс министрлігі Каспий теңізінің қазақстандық секторындағы №200 ауданды минадан тазартуы тиіс. Жоспарланған суасты мұнай құбырлары дәл осы аумақ арқылы өтеді.
Жоба мәтінінде Қорғаныс министрлігі «Қаламқас-теңіз» және «Хазар» инвестициялық жобаларына арналған суасты мұнай құбырларының бағыты өтетін теңіз ауданында минасыздандыру жұмыстарын жүргізетіні көрсетілген. Мұнда тек теңіз түбін зерттеу жұмыстары ғана емес, суастындағы іздестіру-құтқару және жарылыс-техникалық операциялар да атқарылады.
Арнайы жабдықты жоба операторы сатып алады
Мұндай жұмыстарға дайындық бұған дейін басталған. 2025 жылдың мамырында Қорғаныс министрлігі, Энергетика министрлігі және Kalamkas-Khazar Operating компаниясы ынтымақтастық туралы меморандумға қол қойған. Құжатқа сәйкес, минасыздандыруға қажетті арнайы жабдықты жоба операторы сатып алады. Кейін бұл құрал-жабдықтар Қазақстан Қорғаныс министрлігінің меншігіне беріледі.
Сондай-ақ заң жобасының түсіндірме жазбасында салықтық мәселелер де қарастырылған. Онда Қорғаныс министрлігі жүргізетін суасты іздестіру және жарылыс-техникалық жұмыстардың нәтижесінде Kalamkas-Khazar Operating компаниясында корпоративтік табыс салығы мен жер қойнауын пайдалануға салынатын баламалы салықты есептеу үшін табыс туындамайтыны атап өтілген.
