Kaspii teńiziniń túbimen Qazaqstan men Ázerbaijandy jalǵaityn talshyqty-optikalyq bailanys jelisi iske qosyldy. Aqtaý men Sýmgait qalalarynyń arasyna uzyndyǵy 380 shaqyrym bolatyn kabel tóseldi. Qosylý rásimine eki eldiń memleket basshylary qatysty. "Qazaqtelekom" basqarma tóraǵasy Baǵdat Mýsin bul jobany kompaniia komandasynyń úlken jetistigi dep baǵalady, dep habarlaidy dalanews.kz.
Onyń sózinshe, sýasty jelisine arnalǵan salmaǵy 600 tonna arnaiy kabel Qytaidaǵy zaýytta jasalǵan. Keiin ol qurlyq arqyly 8 myń shaqyrymnan astam jol júrip, Kaspii jaǵalaýyna jetkizilgen.
Jobany júzege asyrý aldynda mamandar teńiz túbin zerttep, kabel ótetin eń qolaily baǵytty tańdaǵan. Ony tóseý úshin arnaiy keme qaita jabdyqtalyp, qajetti tehnikalyq qurylǵylar ornatylǵan. Teńizdegi jumysty keme ekipajy, injenerler men tehnikalyq mamandar táýlik boiy atqarǵan.
"Dostar, barshańyzdy quttyqtaimyn! Kaspii teńizi arqyly talshyqty-optikalyq bailanys ornatyldy. Sýmgaittan Aqtaýǵa deiin teńiz túbimen 380 shaqyrym kabel tóseldi. Bizdiń komanda úshin bul úlken jetistik", - dedi Baǵdat Mýsin.
Qazaqstanǵa qandai múmkindik beredi?
Baǵdat Mýsin jańa jeliniń Qazaqstan úshin úsh negizgi artyqshylyǵyn atady. Birinshiden, el aýmaǵy arqyly derekter tasymaly artyp, Qazaqstan Qytai men Eýropa arasyndaǵy tsifrlyq tranzitke qosylady. Osylaisha elimiz taýarmen qatar, aqparat aǵynyn da tasymaldaityn bolady.
"Qytai men Eýropa arasynda endi tek taýar ǵana emes, derekter de tasymaldanady. Bul Qazaqstannyń tranzittik áleýetin jańa deńgeige kóteredi", - dedi ol.
Ekinshiden, Ortalyq Aziia elderi úshin internetke shyǵatyn balama ári táýelsiz baǵyt paida bolady. Buǵan deiin óńir memleketteri derekterdi negizinen Resei men Qytai arqyly tasymaldap kelgen. Endi Frankfýrt, Ystanbul jáne Eýropanyń ózge de qalalarymen tikelei bailanys ornatýǵa múmkindik týady.
Úshinshiden, derekterdi jetkizý kezindegi kidiris, iaǵni latenttilik kórsetkishi tómendeidi. Baǵdat Mýsinniń aitýynsha, synaq nátijesinde internet bailanysynyń bul kórsetkishi eki ese jaqsarǵan.
"Biz táýelsiz jańa baǵyt qalyptastyryp jatyrmyz. Alǵashqy synaq kezinde kidiris kórsetkishi eki ese jaqsardy. Bul Qazaqstan úshin úlken jeńis. Joba barshamyzdyń igiligimizge qyzmet etsin", - dedi "Qazaqtelekom", - basshysy.
Transkaspii jelisi Qazaqstannyń Aziia men Eýropa arasyndaǵy tsifrlyq kópir retindegi ornyn nyǵaityp, halyqaralyq derekter tranzitin ulǵaitýǵa múmkindik beredi. Jobanyń josparlanǵan ótkizý qabileti sekýndyna 400 terabitke deiin jetedi.
