Kásipkerler neni eskerýi qajet?
Osyǵan orai, jýyrda Shý aýdandyq Mádeniet úiinde osy taqyryp tóńireginde jiyn ótti. Kezdesý jiynyn aýdan ákiminiń orynbasary Nurlan Jaqsybaev júrgizdi. Sondai-aq, jeke kásipkerlerge túsindirý jumysyn júrgizý maqsatynda Jambyl oblysy boiynsha memlekettik kirister departamenti basqarmasy basshysynyń mindetin atqarýshy Ó.Qospanov, departamenttiń bas mamandary Q.Mamaserikov, G.N.Narenova, J.Bahtash, E.Taýbekov, Shý aýdany boiynsha memlekettik kirister basqarmasynyń basshysy A.Ajmahanov arnaiy qatysty. Nurlan Segizbaiuly jiynnyń maqsaty men jumysshy topty tanystyrǵannan keiin, sóz kezegin Ómirzaq Qospanovqa berdi. Ol óz baiandamasynda salyq tóleýshilerdiń kassalyq apparat ornatý mindettiligi jaiynda keńirek túsindirdi.
– 2019 jyldyń 1 qańtarynan bastap shaǵyn biznes sýbektileri úshin arnaýly salyq rejimin qoldanatyn kásipkerler ashyq saýda bazarlarynyń aýmaǵynda statsionarlyq emes nysandarda jumys jasaityndary baqylaý kassalyq mashinasyn qoldanýǵa mindetti bolady. Al, 2020 jyldan bastap patent sheńberinde jumys isteitin salyq tóleýshilerge BKM qoldaný mindettiligi týyndaidy. QR zańnamasy talaptary boiynsha BKM qoldanýdan jaltarǵan adamdar mindetti túrde jaýapqa tartylady, - dedi Ómirzaq Sailaýuly.
Óz kezeginde E.Taýbekov elektrondy shot faktýra jazýdaǵy jańa talaptarǵa toqtaldy. Al atalmysh departamenttiń kameraldy baqylaý basqarmasynyń bas mamany G.Narenova «Derekterdi tirkeý jáne berý fýnktsiiasy bar baqylaý-kassa mashinalaryn qoldaný – táýekelder basqarý júiesiniń bir belgisi» taqyrybynda baiandama jasady.
Atap óterligi, 2018 jylǵy 5 qazanda qazaqstandyqtarǵa jariialanǵan «Qazaqstandyqtardyń ál-aýqatynyń ósýi: tabys pen turmys sapasynyń arttyrý» atty Joldaýda Tuńǵysh Prezident N.Á.Nazarbaev 2019 jyldyń 1 qańtarynan bastap shaǵyn jáne orta biznes ókilderine salyqtyq rahymshylyq jasaý qajettigin atap ótken bolatyn. Bul jańashyldyq jaiynda jiyn barysynda J.Baltash túsindirip ótti.
Jambyl oblysy aýmaǵynda shaǵyn jáne orta biznes sýbektileriniń sany 63 myńǵa jetti. Biylǵy jyldan bastap kásipkerlerdiń ósimpul men aiyppuldaryna salyqtyq rahymshylyq jasalatyn bolady. Bul zań óz kúshine endi. Zańǵa sáikes, salyqtyq rahymshylyq shaǵyn jáne orta biznes sýbektilerine 2018 jyldyń 1 qazanyndaǵy negizgi qaryzyn 2019 jyldyń 31 jeltoqsanyna deiin tólegen jaǵdaida ósimpul men aiyppul esepten shyǵarylady, - deidi J.Baltash.
Jambyl oblysy
Shý aýdany
