Asa iri kólemde alaıaqtyq jasady degen kúdikti Qyrǵyzstannan ekstradısıalandy, - dep habarlaıdy Dalanews.kz.
Qazaqstan Respýblıkasynyń Bas prokýratýrasy Qazaqstan azamatyn asa iri kólemde alaıaqtyq jasaǵany úshin qylmystyq jaýapkershilikke tartý maqsatynda Qyrǵyz Respýblıkasynan ekstradısıalady.
Kúdikti 2023 jyly Almatyda jeldetýge arnalǵan bólshekter men kondısıonerlerdi jetkizemiz degen syltaýmen kásipkerdiń 75 mıllıon teńgeden astam qarjysyn jymqyrǵan.
Qylmys jasaǵannan keıin alaıaq qashyp ketken, sol sebepti ol halyqaralyq izdeýge jarıalanǵan.
Aǵymdaǵy jyldyń mamyr aıynda ol Bishkek qalasynda ustalyp, odan keıin Qazaqstan Respýblıkasy Bas prokýratýrasynyń suraýy boıynsha otanyna ekstradısıalandy.
Qazirgi ýaqytta kúdikti Almaty qalasynyń ýaqytsha ustaý ızolátoryna qamaldy.
Aıyptalǵan qylmys úshin múlki tárkilenip, bes jyldan on jylǵa deıingi merzimge bas bostandyǵynan aıyrý jazasy qarastyrylǵan.
