Qairat Satybaldynyń burynǵy áieli Gúlmira Satybaldyǵa qatysty basty sot otyrysy bastaldy, - dep habarlaidy Dalanews.kz.
Tengrinews.kz málimetinshe, Almatynyń qylmystyq ister jónindegi mamandandyrylǵan aýdanaralyq sotynda Gúlmira Satybaldy men onyń burynǵy júrgizýshisi Mádi Batyrshaevqa qatysty sot talqylaýy bastalǵan. Olar kásipkerdi bopsalap, zańsyz bas bostandyǵynan aiyrdy dep aiyptalyp oytr. Protseste tóraǵalyq etýshi sýdia - Martpek Kákimjanov.
Satybaldy Astanadaǵy mekemeden Almatyǵa jetkizilgen, oǵan qosa ol ekinshi aiyptalýshymen birge protseske qatysady. Sondai-aq, zalda jábirlenýshi kásipker Júnisov pen onyń eki aǵasy bar.
Buǵan deiin Almatynyń qylmystyq ister jónindegi sotynda Gúlmira Satybaldynyń isi boiynsha aldyn ala tyńdaý ótti. Sottyń aldyn ala tyńdaýy kezinde Gúlmira Satybaldy alqabiler sotynan bas tartty.
Sottalýshy oryndyǵynda Gúlmira Satybaldymen qosa, onyń júrgizýshisi Mádi Batyrshaev ta boldy. Sot otyrysy onlain rejimde ótti, al aiyptalýshylar Astananyń tergeý izoliatorynda boldy. Artynsha olar Almatyǵa jetkiziletini belgili boldy.
Gúlmira Satybaldyǵa Qylmystyq kodekstiń 126-baby "Zańsyz bas bostandyǵynan aiyrý" boiynsha aiyppen qosa, asa aýyr qylmys jasady degen aiyp taǵyldy: Qylmystyq kodekstiń 194-babynyń 3-bóligi "Iri mólsherde múlik alý maqsatynda jasalǵan qorqytyp alýshylyq". Bul bap asa aýyr bolyp esepteledi jáne ol boiynsha aiyptalýshy alqabilerdiń qatysýymen sot ótkizýdi suraýyna quqyly.
Buǵan deiin Gúlmira Satybaldy men onyń qaramaǵyndaǵylarǵa taǵy bir is boiynsha úkim shyqqan edi. Ol adam urlaǵany men ozbyrlyq jasaǵany úshin kináli dep tanyldy.
