Ońtústik Koreianyń Phionthek qalasynda bolǵan jappai tóbeleske qatysqandardyń arasynda ázirge Qazaqstan azamattary anyqtalǵan joq, dep habarlaidy dalanews.kz.
Bul týraly Qazaqstannyń Syrtqy ister ministrligi málimdedi.
«Aldyn ala málimetter boiynsha, Phionthektegi jappai tóbeleske qatysýshylardyń ishinde jeke basy anyqtalǵandar men ustalǵandar arasynda Qazaqstan azamattary joq», – dep habarlady SIM.
Jappai tóbeles 3 qazan kúni keshke Phionthek qalasynda balabaqsha men bastaýysh mekteptiń mańynda bolǵan. Alǵashynda kýágerler janjalǵa shamamen 40 adam qatysqanyn habarlaǵan. Alaida politsiia beinebaqylaý kameralaryndaǵy jazbalardy zerttegennen keiin tóbeleske tikelei shamamen 15 adamnyń qatysqanyn anyqtady. Oqiǵa ornynan quqyq qorǵaý organdary aǵash taiaqtar men beisbol taiaqtaryn tapqan.
Qazirgi ýaqytta politsiia 20 jastaǵy eki er adamdy ustady. Qalǵan qatysýshylardy izdeý jalǵasyp jatyr. Olardyń jeke basy men azamattyǵy anyqtalýda.
Buǵan deiin áleýmettik jeliler men jergilikti aqparat quraldarynda jappai tóbeleske Ortalyq Aziia elderinen shyqqan azamattar, onyń ishinde Qazaqstan men Qyrǵyzstan azamattary qatysýy múmkin degen aqparat taraǵan bolatyn.
Ońtústik Koreia politsiiasy oqiǵa boiynsha tergeýdi jalǵastyryp jatyr.
