Atymtaı jomart 700 qap undy Maqtaaral aýdandyq kásipkerlik bólimi tarapynan daıyndalǵan qoımaǵa tabystady.
Qazirgi ýaqytta undy taratý úshin kentter men aýyldyq okrýg ákimdikteri tarapynan muqtaj otbasylardyń tizimi jasaqtalýda. Jalpy salmaǵy 17,5 tonnany quraıtyn un Maqtaaral aýdanyndaǵy 2 kent pen 9 aýyldyq okrýgtegi az qamtamasyz etilgen, kóp balaly otbasylarǵa beriletin bolady.
Birinshi surypty, naýbaıhanalyq "Pıoner" uny qazirgi tańda elimizdegi eń suranysqa ıe ónimderdiń biri ekeni belgili. Buǵan deıin aýdandyq kásipkerlik bólimi tarapynan baǵany turaqtandyrý maqsatynda birneshe ret túsindirý jumystary jasalyp, dúkenderde 8500 teńgeden satylǵan birinshi surypty "Pıoner" uny 7700 teńgege túsirilgen edi. Bul ıgi sharaǵa da mesenat-kásipker Nurjan Ermahanuly yqpal etip, jerlesteri úshin úlken kómegin tıgizdi.
– Nurjan sıaqty kásipkerlerimiz barda elimiz eshqashan eńsesin túsirmeıtini belgili. Elbasymyz Nursultan Nazarbaev týǵan jerge týyńdy tik dep aıtty emes pe? Mine, elimizde tótenshe jaǵdaı týyndap, qıyn-qystaý kezeńde jerlesteri úshin 700 qap undy tegin bere salý kóp jomart jandardyń qolynan kele bermeıtin úlken is. Baýyrymyzdyń jaqsylyǵy Alladan myń ese bop qaıtsyn! – dedi aýdandyq kásipkerlik bóliminiń basshysy Óser Myrzamdamov.
Aıta keteıik, aýdandyq kásipkerlik bólimi tarapynan arnaıy qoıma daıyndalyp, unnan bólek, makaron, maı, qaraqumyq, qumsheker sıaqty t.b. eń qajetti azyq-túlikterdiń qory jınaqtalýda.
Maqtaaral aýdany ákiminiń baspasóz qyzmeti
