Túrkistan oblysy, Báıdibek aýdanynyń azamaty, kásipker Marat Táttibaev Qoshqarata eldi mekenindegi Borlysaı jalpy orta mektebinde oqıtyn kópbalaly jáne turmys jaǵdaıy tómen 40 otbasynyń balalaryna arnap mektepke qajetti oqý quraldary men pándik kitaptardy syıǵa tartty, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Uıymdastyrýshysy – Borlysaı aýyldyq okrýginiń «Qoshqarata Bereke» qoǵamdyq qaıyrymdylyq qory.

Borlysaı aýyldyq okrýginde dúnıege kelip, qazirgi tańda Almaty qalasynda turatyn jeke kásipker Marat Táttibaev ózi týyp-ósken aýyl-aımaqqa ıgilikti is jasaýdy dástúrge aınaldyrǵan.

Ol jyl saıyn óziniń týǵan jeri Borlysaı aýyldyq okrýgindegi kópbalaly jáne turmysy tómen otbasylarǵa demeýshilik jasap, kómek qolyn sozyp, qoldaý bildirip keledi.

Týǵan jerinen jyraqta júrse de, Borlysaı aýyldyq okrýginiń damýyna óz úlesin qosyp otyrǵan azamatqa jerlesteriniń alǵysy sheksiz.