Qazaqstanda kóktemgi egis naýqanyna daiyndyq aiasynda áleýmettik mańyzy bar daqyldardyń kólemi ulǵaitylady. Úkimet janyndaǵy jedel shtab otyrysynda 2026 jyly óńirlerge kartop pen sábiz egistigin arttyrý mindeti júkteldi.
Ulttyq ekonomika vitse-premeri Serik Jumanǵarinniń tóraǵalyǵymen ótken jiynda Aýyl sharýashylyǵy vitse-ministri Azat Sultanov ónim kólemi baǵa turaqtylyǵyna tikelei áser etetinin atap ótti. Onyń aitýynsha, byltyr uiymdasqan sharýashylyqtarda kartop alqaby 12,5 myń gektarǵa ulǵaiǵan.
«Ónim kólemi naryqtaǵy baǵaǵa tikelei yqpal etedi. Osyǵan bailanysty óńirler túpkilikti egis qurylymyn bekitken kezde sábiz alqaptaryn arttyrýdy mindetti túrde eskerýi kerek», dedi vitse-ministr.
Sonymen qatar, 2026 jyly qaraqumyq egistigin 10 myń gektarǵa ulǵaityp, 101 myń gektarǵa jetkizý josparlanyp otyr. Óńirlerge bul kórsetkishterdi oryndaý tapsyryldy.
Úkimet kýkýrýza egisin keńeitýge de basymdyq berip otyr. Bul Jambyl oblysynda salynatyn Fufeng Group-tyń iri óńdeý parki men Túrkistan oblysyndaǵy krahmal-sirne zaýytyn shikizatpen qamtamasyz etý úshin qajet. Osy maqsatta soltústik úsh astyqty óńirde kýkýrýza alqaby árqaisysynda orta eseppen 15 myń gektarǵa ulǵaitylýy tiis.
Aýyl sharýashylyǵy ministrligi óńirlerge ádistemelik jáne tehnologiialyq qoldaý kórsetýge daiyn ekenin málimdedi. Qytai tarapy da soltústik óńirlerge beiimdelgen sorttar men ósirý tehnologiialaryn usynýǵa ázir ekenin bildirdi.
Sonymen birge mineraldy tyńaitqyshtardy jetkizý bastaldy. «Qazfosfatpen» 2026 jylǵa ammofostyń bir tonnasy QQS-syz 254 myń teńge deńgeiinde bekitildi. Bul ótken jylmen salystyrǵanda 15 paiyzǵa joǵary.
Biyl kóktemgi jáne egin jinaý jumystaryna 7 myńnan astam sharýashylyqqa 501,5 mlrd teńge kóleminde nesie berilgen. Qazirgi tańda 126 fermerge 17 mlrd teńge maquldanyp, taǵy 235 ótinim 76 mlrd teńgege qaralýda.
Úkimet bul sharalar ishki naryqtaǵy azyq-túlik baǵasyn turaqtandyryp, óńirlerdegi óndiris kólemin arttyrýǵa múmkindik beredi dep otyr.
