Úkimette áleýmettik mańyzy bar azyq-túlik ónimderiniń baǵasyn turaqtandyrý máseleleri boiynsha keńes ótti. Talqylaý qorytyndysy boiynsha Premer-ministrdiń orynbasary – ulttyq ekonomika ministri Serik Jumanǵarin turaqtandyrý qorlarynda kókónisti saqtaý jumysyn tiisti deńgeide atqarmaǵan oblys ákimderiniń orynbasarlaryna sógis jariialady, dep habarlaidy Dalanews.kz.
QR Saýda jáne integratsiia ministrliginiń málimetinshe, ótken aptada áleýmettik mańyzy bar azyq-túlik ónimderiniń ortasha baǵa indeksi 0,2%-dy qurady, bul 2025 jyldyń basynan bergi eń tómen kórsetkish. Saýda jáne integratsiia birinshi vitse-ministri Aijan Bijanova 2025 jyldyń basynan beri áleýmettik mańyzy bar azyq-túlik ónimderiniń baǵasynyń ortasha ósimi 3,4%-dy quraǵanyn, biraq naýryz aiynyń basynan bastap baǵanyń ósý dinamikasy 0,4%-ǵa báseńdegenin atap ótti. Biylǵy jyldyń basynan beri eń joǵary baǵa ósimi kartopqa (+19,3%), qyryqqabatqa (+23,2%) jáne siyr etine (+9,0%) tiesili. Sonymen qatar kúrishtiń (-3,4%), jumyrtqanyń (-2,1%) jáne unnyń (-0,3%) baǵasy tómendegeni baiqaldy.
«Baǵanyń eń joǵary ósimi Aqtóbe oblysynda (+0,8%), Shyǵys Qazaqstan jáne Pavlodar oblystarynda (+0,5%), Jetisý oblysynda (+0,4%) tirkeldi. Sonymen qatar Astana qalasynda (-0,2%) jáne Batys Qazaqstan oblysynda (-0,1%) baǵa indeksi tómendedi», — dep atap ótti Aijan Bijanova.
Aýyl sharýashylyǵy vitse-ministri Erbol Tasjúrekov óńirlerdegi kókónis qorlarynyń bosatylý barysy týraly habarlady. Jergilikti atqarýshy organdardyń málimetinshe, 12 naýryzdaǵy jaǵdai boiynsha áleýmettik-kásipkerlik korporatsiialar (ÁKK) turaqtandyrý qorlary úshin kelisimshart jasaǵan kartop qory 41,3 myń tonnany quraidy. Alaida keibir óńirlerde júrgizilgen tekserý nátijesinde málimdelgen kólem men kartoptyń naqty qory arasynda aitarlyqtai aiyrmashylyq bar ekeni anyqtaldy.
Mańǵystaý oblysynda málimdelgen ÁKK-niń 2,5 myń tonnadan astamynyń tek 25 tonnasy ǵana naqty rastaldy. Shyǵys Qazaqstan oblysynda málimdelgen ÁKK-niń 1,6 myń tonnadan astamynyń tek 35 tonnasy ǵana bolǵan. Atyraý oblysynda málimdelgeni – 394 tonna, rastalǵany – 110 tonna.
Abai oblysynda málimdelgeni 2,2 myń tonnadan astam, rastalǵany 183 tonna. Jambyl oblysynda málimdelgeni 2,6 myń tonnadan astam, tekserý nátijesinde bar bolǵany 308 tonna rastaldy. Ulytaý oblysynda ÁKK 1,8 myń tonnadan astam dep málimdegenniń naqty 827 tonnasy bolǵan. Batys Qazaqstan oblysynda ÁKK málimdegen 2,3 myń tonnadan astamynyń 1,3 myń tonnasy rastaldy.
Anyqtalǵan kemshilikter negizinde vitse-premer oblys ákimderiniń orynbasarlaryna kartop qorlarynyń durys baqylanbaýyna bailanysty sógis jariialady. Serik Jumanǵarin Úkimet áleýmettik mańyzy bar azyq-túlik ónimderiniń baǵasyn turaqtandyrý úshin barlyq qajetti sharalardy qabyldaǵanyn atap ótti. Máselen, asyl tuqymdy maldardy eksporttaýǵa tyiym salyndy, kartopty úshinshi elderge eksporttaýǵa alty aiǵa shekteý engizildi, importtyq taýyq jumyrtqalaryn ákelýge tyiym engiziledi. Degenmen, jergilikti atqarýshy organ tarapynan tiisti baqylaý bolmasa, qabyldanǵan sharalardyń nátijeleri tiisti áser bermeidi.
Qazirgi ýaqytta Qazaqstanǵa Pákistan men Qytaidan arzan baǵadaǵy importtyq kartop jetkizý boiynsha jumystar belsendi túrde júrgizilýde. Qazirdiń ózinde Saýda komiteti men «KTZ EXPRESS» ekonomikalyq operatorymen birge 4000 tonna astam kartop importtaldy, taǵy 700 tonna jolda.
Qosymsha, Aýyl sharýashylyǵy ministrligi men «Azyq-túlik korporatsiiasy» AQ birlesip kókónis baǵalaryn turaqtandyrý úshin ózara is-qimyl shemasyn ázirledi. Bul shema áleýmettik-kásipkerlik korporatsiialar men «Azyq-túlik korporatsiiasy» arasyndaǵy ózara is-qimyl arqyly ónim jetkizý jáne óndirýshilerdi qarjylyq qoldaý kórsetý úshin qarastyrylǵan.
