ۇكىمەتتە الەۋمەتتىك ماڭىزى بار ازىق-تۇلىك ونىمدەرىنىڭ باعاسىن تۇراقتاندىرۋ ماسەلەلەرى بويىنشا كەڭەس ءوتتى. تالقىلاۋ قورىتىندىسى بويىنشا پرەمەر-مينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين تۇراقتاندىرۋ قورلارىندا كوكونىستى ساقتاۋ جۇمىسىن ءتيىستى دەڭگەيدە اتقارماعان وبلىس اكىمدەرىنىڭ ورىنباسارلارىنا سوگىس جاريالادى، دەپ حابارلايدى Dalanews.kz.
ق ر ساۋدا جانە ينتەگراسيا مينيسترلىگىنىڭ مالىمەتىنشە، وتكەن اپتادا الەۋمەتتىك ماڭىزى بار ازىق-تۇلىك ونىمدەرىنىڭ ورتاشا باعا يندەكسى 0،2%-دى قۇرادى، بۇل 2025 جىلدىڭ باسىنان بەرگى ەڭ تومەن كورسەتكىش. ساۋدا جانە ينتەگراسيا ءبىرىنشى ۆيسە-مينيسترى ايجان بيجانوۆا 2025 جىلدىڭ باسىنان بەرى الەۋمەتتىك ماڭىزى بار ازىق-تۇلىك ونىمدەرىنىڭ باعاسىنىڭ ورتاشا ءوسىمى 3،4%-دى قۇراعانىن، ءبىراق ناۋرىز ايىنىڭ باسىنان باستاپ باعانىڭ ءوسۋ ديناميكاسى 0،4%-عا باسەڭدەگەنىن اتاپ ءوتتى. بيىلعى جىلدىڭ باسىنان بەرى ەڭ جوعارى باعا ءوسىمى كارتوپقا (+19،3%)، قىرىققاباتقا (+23،2%) جانە سيىر ەتىنە (+9،0%) تيەسىلى. سونىمەن قاتار كۇرىشتىڭ (-3،4%)، جۇمىرتقانىڭ (-2،1%) جانە ۇننىڭ (-0،3%) باعاسى تومەندەگەنى بايقالدى.
«باعانىڭ ەڭ جوعارى ءوسىمى اقتوبە وبلىسىندا (+0،8%)، شىعىس قازاقستان جانە پاۆلودار وبلىستارىندا (+0،5%)، جەتىسۋ وبلىسىندا (+0،4%) تىركەلدى. سونىمەن قاتار استانا قالاسىندا (-0،2%) جانە باتىس قازاقستان وبلىسىندا (-0،1%) باعا يندەكسى تومەندەدى»، — دەپ اتاپ ءوتتى ايجان بيجانوۆا.
اۋىل شارۋاشىلىعى ۆيسە-مينيسترى ەربول تاسجۇرەكوۆ وڭىرلەردەگى كوكونىس قورلارىنىڭ بوساتىلۋ بارىسى تۋرالى حابارلادى. جەرگىلىكتى اتقارۋشى ورگانداردىڭ مالىمەتىنشە، 12 ناۋرىزداعى جاعداي بويىنشا الەۋمەتتىك-كاسىپكەرلىك كورپوراسيالار (اكك) تۇراقتاندىرۋ قورلارى ءۇشىن كەلىسىمشارت جاساعان كارتوپ قورى 41،3 مىڭ توننانى قۇرايدى. الايدا كەيبىر وڭىرلەردە جۇرگىزىلگەن تەكسەرۋ ناتيجەسىندە مالىمدەلگەن كولەم مەن كارتوپتىڭ ناقتى قورى اراسىندا ايتارلىقتاي ايىرماشىلىق بار ەكەنى انىقتالدى.
ماڭعىستاۋ وبلىسىندا مالىمدەلگەن اكك-نىڭ 2،5 مىڭ توننادان استامىنىڭ تەك 25 تونناسى عانا ناقتى راستالدى. شىعىس قازاقستان وبلىسىندا مالىمدەلگەن اكك-نىڭ 1،6 مىڭ توننادان استامىنىڭ تەك 35 تونناسى عانا بولعان. اتىراۋ وبلىسىندا مالىمدەلگەنى – 394 توننا، راستالعانى – 110 توننا.
اباي وبلىسىندا مالىمدەلگەنى 2،2 مىڭ توننادان استام، راستالعانى 183 توننا. جامبىل وبلىسىندا مالىمدەلگەنى 2،6 مىڭ توننادان استام، تەكسەرۋ ناتيجەسىندە بار بولعانى 308 توننا راستالدى. ۇلىتاۋ وبلىسىندا اكك 1،8 مىڭ توننادان استام دەپ مالىمدەگەننىڭ ناقتى 827 تونناسى بولعان. باتىس قازاقستان وبلىسىندا اكك مالىمدەگەن 2،3 مىڭ توننادان استامىنىڭ 1،3 مىڭ تونناسى راستالدى.
انىقتالعان كەمشىلىكتەر نەگىزىندە ۆيسە-پرەمەر وبلىس اكىمدەرىنىڭ ورىنباسارلارىنا كارتوپ قورلارىنىڭ دۇرىس باقىلانباۋىنا بايلانىستى سوگىس جاريالادى. سەرىك جۇمانعارين ۇكىمەت الەۋمەتتىك ماڭىزى بار ازىق-تۇلىك ونىمدەرىنىڭ باعاسىن تۇراقتاندىرۋ ءۇشىن بارلىق قاجەتتى شارالاردى قابىلداعانىن اتاپ ءوتتى. ماسەلەن، اسىل تۇقىمدى مالداردى ەكسپورتتاۋعا تىيىم سالىندى، كارتوپتى ءۇشىنشى ەلدەرگە ەكسپورتتاۋعا التى ايعا شەكتەۋ ەنگىزىلدى، يمپورتتىق تاۋىق جۇمىرتقالارىن اكەلۋگە تىيىم ەنگىزىلەدى. دەگەنمەن، جەرگىلىكتى اتقارۋشى ورگان تاراپىنان ءتيىستى باقىلاۋ بولماسا، قابىلدانعان شارالاردىڭ ناتيجەلەرى ءتيىستى اسەر بەرمەيدى.
قازىرگى ۋاقىتتا قازاقستانعا پاكىستان مەن قىتايدان ارزان باعاداعى يمپورتتىق كارتوپ جەتكىزۋ بويىنشا جۇمىستار بەلسەندى تۇردە جۇرگىزىلۋدە. ءقازىردىڭ وزىندە ساۋدا كوميتەتى مەن «KTZ EXPRESS» ەكونوميكالىق وپەراتورىمەن بىرگە 4000 توننا استام كارتوپ يمپورتتالدى، تاعى 700 توننا جولدا.
قوسىمشا، اۋىل شارۋاشىلىعى مينيسترلىگى مەن «ازىق-تۇلىك كورپوراسياسى» اق بىرلەسىپ كوكونىس باعالارىن تۇراقتاندىرۋ ءۇشىن ءوزارا ءىس-قيمىل سحەماسىن ازىرلەدى. بۇل سحەما الەۋمەتتىك-كاسىپكەرلىك كورپوراسيالار مەن «ازىق-تۇلىك كورپوراسياسى» اراسىنداعى ءوزارا ءىس-قيمىل ارقىلى ءونىم جەتكىزۋ جانە وندىرۋشىلەردى قارجىلىق قولداۋ كورسەتۋ ءۇشىن قاراستىرىلعان.
