Qazaqstannyń Aýyl sharýashylyǵy vitse-ministri Azat Sultanov úkimettiń brifinginde qarapaiym kartop pen “premiým” kartop arasyndaǵy baǵa aiyrmashylyǵynyń sebebin túsindirdi, dep habarlaidy Dalanews.kz.
“Erte pisken kartoptyń baǵasy ony ósirý tehnologiiasyna tikelei bailanysty. Túrkistan oblysy, Saryaǵash aýdanynda mundai kartop arnaiy úldirdiń astynda ósiriledi. Bul – qosymsha shyǵyndy qajet etetin tásil. Sondyqtan da onyń baǵasy joǵary”, — dedi Sultanov.
Onyń aitýynsha, maýsymaralyq kezeńde, iaǵni shetelden ákelinetin kartop áli tolyq jetkizilmegen kezde, jańa jinalǵan ónimge degen suranys artady. Tek daladan terilgen, qabyǵy juqa ári syrttai tartymdy kórinetin bul kartopqa halyqtyń yqylasy zor.
“Mundai ónim “premiým” sanatyna jatady, sondyqtan onyń baǵasyna memleket aralasa almaidy. Al qarapaiym “áleýmettik” kartop 400 teńgege deiin turady jáne barshaǵa qoljetimdi. Sáikesinshe, eger ónim premiým deńgeiinde bolsa, ony áleýmettik álsiz toptarǵa jappai qoljetimdi etý múmkin emes. Degenmen, elde kartop tapshylyǵy joq, — dedi vitse-ministr.
Eske salaiyq, mamyr aiynyń basynda bir qazaqstandyq turǵyn áleýmettik jelide video jariialap, kartoptyń 1300 teńgege deiin qymbattap ketkenine narazylyǵyn bildirgen edi.
“Shetelden ákelinbegen, jergilikti ónim bolsa da, nege munsha qymbat?” — dep tańdanysyn jasyrmady ol.
Al dúkenderde qarapaiym kartop shamamen 390 teńgeden satylyp jatyr. Alaida 2025 jyldyń qańtar aiynda halyqqa árdaiym qoljetimdi bolǵan qarapaiym kartop kúrt qymbattap, bir kelisi 500 teńgege deiin jetken edi. Bul ósimdi Aýyl sharýashylyǵy ministrligi aradaǵy aram piǵyldy deldaldardyń alypsatar áreketterimen bailanystyrǵan.
