Qazaqstanda Smart Data Finance analitikalyq platformasy iske qosylǵannan keiin el arasynda bank kartasyna túsken kez kelgen aqshaǵa salyq salynýy múmkin degen pikir keń tarady. Alaida qarjyger, salyq keńesshisi, Qazaq Expert Club sarapshysy Raýshan Tasshoinova munyń shyndyqqa janaspaitynyn aitady. Onyń sózinshe, kez kelgen aýdarym tabys retinde qarastyrylmaidy jáne oǵan avtomatty túrde salyq salynbaidy, dep habarlaidy dalanews.kz.
"Smart Data Finance – Memlekettik kirister komiteti paidalanatyn aqparattyq-taldaý júiesi. Ol túrli memlekettik organdardyń, ekinshi deńgeili bankterdiń jáne basqa da uiymdardyń 74 derekkózinen aqparat jinap, 36 aqparattyq júiemen bailanysqan. Osy málimetter arqyly salyq organdary kúmándi qarjylyq operatsiialardy anyqtap, salyqtyq táýekelderdi taldai alady", - deidi sarapshy.
Sarapshynyń aitýynsha, platformada jyljymaityn múlik, kólik quraldary, jer ýchaskeleri, baǵaly qaǵazdar, litsenziialar, eńbek sharttary, notarialdyq áreketter, mobildi aýdarymdar jáne basqa da qarjylai operatsiialar týraly málimetter jinaqtalady. Osy derekter negizinde árbir jeke jáne zańdy tulǵaǵa qatysty tsifrlyq dose qalyptastyrylyp, salyqtyq táýekelderge taldaý júrgiziledi.
Sonymen qatar júie Big Data, jasandy intellekt, mashinalyq oqytý jáne boljamdy analitika tehnologiialaryn paidalanyp, ai saiyn shamamen 500 analitikalyq esep ázirleidi.
Degenmen Raýshan Tasshoinova bul platformanyń múmkindigin asyra baǵalamaýǵa shaqyrady.
"Smart Data Finance ózdiginen salyq eseptemeidi jáne eshkimdi jaýapkershilikke tartý týraly sheshim qabyldamaidy. Onyń negizgi mindeti – úlken kólemdegi aqparatty taldap, qosymsha tekserýdi qajet etýi múmkin operatsiialardy anyqtaý", - deidi salyq keńesshisi.
Qandai jaǵdaida aýdarym salyq organdarynyń nazaryn aýdarýy múmkin?
Sarapshynyń sózinshe, bank kartasyna túsken qarajat árdaiym tabys bola bermeidi. Ol qaryzdy qaitarý, syilyq, týystardyń kómegi, otbasy músheleri arasyndaǵy aýdarym nemese jeke múlikti satýdan túsken qarajat bolýy múmkin.
Alaida eger kartaǵa kóptegen adamnan turaqty túrde aqsha túsip, onyń sipaty kásipkerlik qyzmetke uqsasa, mundai operatsiialar somasyna qaramastan salyq organdarynyń nazaryn aýdarýy yqtimal.
Mundai tásil ózin-ózi jumyspen qamtyǵan azamattarǵa da qatysty. Eger adam qyzmet kórsetip nemese taýar satyp, odan turaqty tabys tapsa, biraq ony deklaratsiialamasa, mundai operatsiialarǵa da qosymsha taldaý júrgizilýi múmkin.
Sondai-aq resmi tabys kólemi men azamattyń shyǵyndary arasynda eleýli aiyrmashylyq bolǵan jaǵdaida da suraq týyndaýy yqtimal.
"Eger adamnyń resmi tabysy bolmasa nemese ol satyp alǵan múlik pen shyǵyndaryna sáikes kelmese, zańnama janama ádister arqyly tabysty anyqtaýǵa múmkindik beredi. Bul jaǵdaida bank shottary, múlik, iri satyp alýlar men mámileler týraly málimetterge taldaý jasalýy múmkin", - deidi Raýshan Tasshoinova.
Qandai aýdarymdar zańbuzýshylyq bolyp sanalmaidy?
Salyq keńesshisiniń aitýynsha, kartaǵa túsken kez kelgen qarajat salyq tóleý mindetin týyndatpaidy.
"Máselen, qaryzdyń qaitarylýy, aqshalai syilyq, týystardyń qarjylai kómegi, otbasy músheleriniń bir-birine aqsha aýdarýy nemese jeke múlikti satýdan túsken qarajat tabys retinde eseptelmeidi. Sondyqtan mundai jaǵdailardyń ózi salyq zańnamasyn buzý bolyp sanalmaidy", - dedi ol.
Degenmen keiin suraq týyndaǵan jaǵdaida qarajattyń qaidan kelgenin dáleldei alatyndai qujattardy saqtap qoiǵan jón.
"Kelisimsharttar, qolhattar, bank úzindileri, múlikti satý qujattary jáne qarajattyń shyǵý tegin rastaityn ózge de qujattardy aldyn ala saqtaǵan durys. Olardy birneshe jyldan keiin qaita qalpyna keltirýge qaraǵanda, birden saqtaý áldeqaida jeńil", - dep keńes beredi sarapshy.
Onyń aitýynsha, salyq organdarynan habarlama kelse de, bul avtomatty túrde salyq esepteldi nemese aiyppul salyndy degendi bildirmeidi.
Aldymen qandai operatsiialarǵa qatysty suraq týyndaǵanyn anyqtap, qajet bolǵan jaǵdaida túsinikteme men rastaityn qujattardy usyný kerek.
"Iaǵni, salyq organdarynan habarlama kelse, bul sizge birden aiyppul salynady nemese jaýapkershilikke tartylasyz degen sóz emes. Ol tek belgili bir qarjylai operatsiialar boiynsha túsinikteme men qajet bolǵan jaǵdaida rastaityn qujattardy suraý úshin jiberiledi", - dep túiindedi sarapshy.
