UQK-niń burynǵy tóraǵasy Kárim Másimovtiń Astanadaǵy záýlim úıinen tárkilengen birneshe buıym aýksıonda saýdalandy. Bul týraly Elektrondy saýda alańynyń derekterinde kórsetilgen, dep habarlaıdy Dalanews.kz.
Saýda 16 qyrkúıekte ótti. Barlyǵy bes lot satyldy.
Eń qymbat lot - «Elizabeth II» serıasyndaǵy, nomınaly 200 dollar, kengýrý beınelengen altyn moneta. Lot úshin tórt qatysýshy básekelesip, bastapqy 3,2 mln teńgelik baǵa 4,3 mln teńgege deıin ósti.
Eń arzan lot zergerlik buıymdar jıyntyǵy boldy. Ol bastapqy baǵasy 22 myń teńgeden 42 myń teńgege deıin kóterilip satyldy. Bul buıymǵa eki satyp alýshy talasty.
Sonymen qatar satylǵandar:
- túrli tústi emal jáne súıek áshekeılerimen qaptalǵan qylysh – 385 myń teńgege;
- eki kavkazdyq qanjar – 438 myń teńgege;
- sary metaldan jasalǵan qynǵa salynǵan pyshaq – 155 myń teńgege.
Qaıtarylǵan aktıvterdi basqarý kompanıasy bul zattardyń naqty kimnen alynǵanyn ashyp aıtpady. Alaıda olardyń barlyǵy Kárim Másimovke tıesili záýlim úıden tárkilengen múlik tizimine kiredi.
