Kárim Másimovtiń halyqaralyq izdeýde júrgen burynǵy kúieý balasy, qyzmettik ókiletin asyra paidalaný jáne qarjy jymqyrý faktileri boiynsha kúdikke ilingen Azamat Qapenovtiń esimi taǵy bir daýly oqiǵamen bailanystyrylyp otyr. Eń qyzyǵy, atalǵan is te dál Kárim Másimov UQK-ni basqarǵan kezeńde toqtatylǵan. Bul týraly jýrnalist Mihail Kozachkov málimdedi, dep habarlaidy dalanews.kz.
Jýrnalistiń aitýynsha, Azamat Qapenovtiń mansaby Kárim Másimovtiń qyzy Támilla Kárimge úilengennen keiin kúrt ózgergen. Oǵan deiin ol qarapaiym kásipker bolǵan ári buzaqylyq isi boiynsha sottalyp úlgergen. Alaida otbasylyq mártebesi ózgergen soń, burynǵy qylmystyq isi boiynsha tolyq aqtalyp shyqqan.
“Bul material jaryq kórgennen keiin Qapenovtiń qazirgi advokattary áleýmettik jelide meni qaralap, túrli pikirler jaza bastady. Biraq men buǵan túsinistikpen qaraimyn. Advokattar men zańgerler arasynda tanystarym kóp. Keibiri dostyqty bárinen joǵary qoiady, al keibiri qomaqty qarjy úshin kez kelgen iske daiyn”, – deidi Kozachkov.
Onyń sózinshe, Qapenovke qatysty buǵan deiin jabylǵan taǵy bir is qaita qaralýy múmkin.
Jýrnalist 2020 jyldyń qazan aiynda bolǵan oqiǵany eske salady. Sol kezde Azamat Qapenov birneshe deneli azamatpen “Kaz-Z Rail Logistics” kompaniiasynyń keńsesine barǵan. Kompaniia temirjol tasymaly salasynda jumys istegen jáne sol jyly memleketke 1 milliard teńgeden astam salyq tólegen.
Kásiporyn direktory Maqsat Shańqybaevtyń aitýynsha, kabinetine kirgen adamdar oǵan kúsh kórsetip, tapansha kórsetken. Keiin Qapenov nege qońyraýlarǵa jaýap bermei, kezdesýden qashyp júrgenin suraǵan.
“Áńgime sońynda Shańqybaevty burynǵy qyzmetkerdi birinshi orynbasar etip taǵaiyndaý týraly qujattarǵa qol qoiýǵa májbúrlegen. Qujattarǵa qol qoiylǵannan keiin olar qaǵazdardy alyp ketip qalǵan”, – dep jazdy jýrnalist.
Osydan keiin kásipker politsiiaǵa aryz túsirgen. Politsiia “Óz betinshe bilik etý” baby boiynsha is qozǵap, qatysýshylardan jaýap alǵan.
Al Azamat Qapenov tergeý barysynda Shańqybaevpen burynnan aralasqanyn aityp, ózin “aǵasy siiaqty qamqor bolǵan adam” retinde sipattaǵan.
“Men oǵan árdaiym kómektestim. Biraq keiin ol bailanysyn úzip ketti. Sondyqtan sóilesýge bardym”, – degen Qapenov.
Al janyndaǵy adamdardyń biznes-ortalyqqa basqa sharýamen kelgeni aitylǵan.
Biraz ýaqyttan keiin Maqsat Shańqybaev quqyq qorǵaý organdaryna qaita aryz jazyp, eshkimge shaǵymy joq ekenin málimdegen. Osydan keiin tergeýshi qylmystyq isti toqtatý týraly sheshim qabyldaǵan.
“Alǵashynda ózin uryp-soǵyp, qarýmen qorqytyp qujattarǵa qol qoiǵyzdy degen adam keiinnen bárinen bas tartady. Mundai ózgeristiń qalai bolǵany túsiniksiz”, – deidi Kozachkov.
Sondai-aq jýrnalist bul oqiǵa bolǵan ýaqytta Kárim Másimovtiń Ulttyq qaýipsizdik komitetiniń tóraǵasy qyzmetin atqarǵanyn eske saldy.
“Múmkin Bas prokýratýra bul istiń materialdaryn qaita qarap, qylmystyq isti toqtatý týraly qaýlynyń kúshin joiatyn shyǵar. Ondai jaǵdaida advokattardyń da, tergeýshilerdiń de jumysy kóbeiedi”, – dep túiindedi Mihail Kozachkov.
