Bul memleket kimge qalady?
Kún saiyn qyzmet babymen qanshama adamdarmen jolyǵamyz, kezdeisoq kórisemiz. Pandemiiadan qorqyp tursaq ta maski taqqan kúii amandyq, saýlyq surasamyz. Sonda birqatary balasy AQSh-ta, nemese Kanada, nemese Londonda ekenin aityp jatady. "Oqýyn bitirgen soń sol jaqta qaldy" deidi ókinishpen. Jatjurttyq bireýge úilenip kete me degen qorqynyshpen keri shaqyryp alǵandarynyń ózi jarty jyl, bir jyl ázer shydap, aqyry qoldaryn bir siltep, ózderi yńǵaily kórgen shet eline tartyp otyrady eken.
Aitatyn ýájderi: "Qazaqstanda jastardyń "kryshasyz" qyzmettik ósýine múmkindik joq", "Jalaqysy mamandardyń shetelde alǵan bilim deńgeiinen áldeqaida tómen", "Korrýptsiialyq bylyq-shylyqtar unamaidy", "Bastyqqa bilimnen góri jaǵympazdyq unaidy"t.b.
Bári ras! Ókinishke qarai biz osyndai el bolashaǵyna senimizdiktiń aýyr saldaryn tarta bastadyq. Rejim aýysqanǵa deiin áli de tartatyn bolamyz.
Keshe ilinip-salynyp Parlament Májilisi men máslihat depýtattarynyń sailaýy ótti. El tanityn birqatar adamdar "sailaýǵa bardyq, ózimiz qalaǵan partiiaǵa daýys berdik" dep jer-jahanǵa jar salyp jatyr. Birqatar baiqaýshylardyń málimetinshe daýys berýshiler sany aitarlyqtai tómendegen. Tek Almatynyń ózinde daýys berý úshin tizimge alynǵandardyń 27,7 paiyzy ǵana kelgen. Bul kórsetkish umytpasam, elordada 44 paiyz, Shymkentte 53 paiyz bolypty. Kóp qalalarda 50 paiyzdyń ar jaq-ber jaǵy. Iaǵni elektorattyń belsendiligi áldeqaida tómendegeni baiqalady.
Halyq ótirik ýádelerden, kózboiaýshylyqtardan sharshaǵan. Onyń ústine qalai daýys bersek te "Nur Otan" jeńedi ǵoi degen saiasi sharasyzdyq. Búgingi ekzit-pýl nómiri birinshi partiia 71 paiyz alǵanyn jariialap ta qoidy. Kúmán kóp. Biraq ákimshilik resýrs bir kisidei jumyldyrylǵan soń bizdiń elimizde basqasha bolýy da múmkin emes qoi.
"Kúrkirep kúndei ótti ǵoi soǵys" demekshi, mineki, sailaý da artta qaldy. Bilik partiiasynyń "oidaǵydai" kósh bastaǵanyn kózimiz kórdi. Búgin-erteń Májilis jasaqtalǵan soń Úkimet te doǵarysqa keter. Jańa Úkimet taǵaiyndalar. 2019 jylǵy Prezident sailaýynan soń Q.Toqaevqa ant bermegen kúsh qurylymdarynyń basshylary biyl da oryntaqtaryn saqtap qalsa ótken jolǵydai oǵan taǵy ant bere qoimas. Keibir vedomstvo basshylary ózgergenimen rejim qaz qalpynda qala beredi.
Sailaý ótkenmen halyq kútken ózgerister, túbegeili reformalar oryn almasy anyq. Munyń bári halyqtyń, ásirese jastardyń erteńgi kúnge degen senimin "dáý tyshqandardai" kemirip barady. Eń sumdyǵy jastardyń ottai janǵan patriottyq sezimderi joiylyp kete me dep qorqamyn.
Elden tehnikalyq, aitishnik, ekonomist mamandar ketip jatyr. Turaqty mekendeýge ketip jatqandarynan basqa jai vizamen baryp qalyp qalǵandar, turýǵa ihtiiarhat kútip júrgender qanshama? Sońǵy tórt jylda emigratsiiaǵa ketip jatqandar onyń aldyndaǵy kezeńmen salystyrǵanda 38 paiyzdan 88 paiyzǵa ósken. Bilik osy tendentsiiany nege qaperge almaidy? Memleket erteńgi kúni kimge qalady, depýtat myrzalar?
