Britandyq The Telegraph pen openDemocracy: "Jysan-nyń túp iesi - Nazarbaev. Kompaniia áýlettiń aktivin basqarý úshin qurylǵan..." dep jazǵan. Muny jalǵan dep málimdegen kompaniia jalma-jan sotqa júgirgen.
"Kúni keshe osy istiń alǵashqy raýndy ótip, bastapqy kezeńde Jysan Holding jeńip ketti", - dep habarlaidy DALA INSIDE telegram arnasy.
Arnanyń jazǵanyndai holdingtiń qorǵaýshylary kompaniianyń eks-prezidentke qatysy joǵyn aityp, aq ter, kók terge túsken.
"Nazarbaev otbasynyń aktivin saqtaýmen ainalyspaimyz. Álgi aqparattyń kesirinen holdingtiń bedeline daq tústi. Britaniiadaǵy birqatar jobalar júzege aspai, kibirtiktep qaldy», - deidi olar.
"Sot barysyn baqylap otyrǵan bizge bulardyń tezisteri tańsyq emes. Formaldy túrde, Nazarbaev ta, onyń kómekshileri de esh jerde emes, Jýsan taqyrybyna múlde qatysy joq. Kompaniianyń mekenjaiy da Qazaqstannan jyraqta, AQSh-tyń Nevada shtatynda tirkelgen
"Jysan Holding" óz kezeginde "New Generation Foundation" qoryna qaraidy. Bul qor ótkende ǵana "NU (Nazarbayev University) Generation" dep atalatyn.
Nazarbaevtyń atyn Jýsanǵa qatysty barlyq jerden alyp tastaý operatsiiasy aiasynda qordyń aty ózgerdi, onyń basshylyǵynan Qazaqstan azamattary, kezinde Nazarbaevtyń janynda júrgen kómekshileri Erbol Orynbaev, Aslan Sárinjipov, Rústem Hamzin, Evgenii Pan túgel ketti. Onyń ornyna basqarmaǵa amerikan lobbisteri keldi. 2000 jyldary bizde Bilim jáne ǵylym ministri bolǵan Nuraly Bekturǵanov qana qaldy. Biraq ol da AQSh azamaty", - dep jazady osy oraida DALA INSIDE.
Bul jaittan sekem alǵan britan basylymdary:
"Jusan Nazarbaevqa tiesili 7,3 mlrd dollardy suq kózden saqtaý úshin qurylǵan. Holding eks-prezidenttiń Britan jerindegi sandyǵy syndy. Qazaqstannyń qazba bailyǵyn ońdy-soldy satyp, shash etekten paidaǵa kenelgen áýlettiń aktivi osy sandyqta "súrlenip" jatyr" dep málim etken.
Nazarbaevtardyń biznes-imperiiasyn áshkerelegen materialdyń sońy janjalǵa ulasyp, Jusan-nyń sotqa shaǵymdanýyna alyp kelgen.
Daýly istiń alǵashqy raýndy holdingtiń jeńisimen aiaqtaldy. Sýdia Jeremi Jonson britandyq basylymdardyń aqparaty «aiyptaý sarynynda jazylǵan» (traktovkasy) degen holding ókilderiniń sózin sóilep ketti.
Óz kezeginde The Telegraph pen openDemocracy Jusan-nyń áreketin sóz bostandyǵyn shekteý dep baǵalap, maqaladaǵy Nazarbaevqa qatysty faktilerdi alyp tastaýdan bas tartty. Bul Nazarbaevtarmen bailanysty delingen holdingtiń túpkilikti jeńisi emes. Britan basylymdary aqyryna deiin arpalysýǵa daiyn otyr.
