Atyraý oblysy ákimdiginiń qoldaýymen uiymdastyrylǵan aitys alamanyna elimizdiń ár qiyrynan 24 aqyn qatysqan. Sóz saiysyna Qazaqstan jáne KSRO Halyq ártisi, «Qazaqstannyń Eńbek eri» ordeniniń iegeri Asanáli Áshimov bastaǵan Ǵalym Jailybai, Svetqali Nurjanov, Altynbek Qorazbaev, Dáýletkerei Kápuly, Janarbek Áshimjan, Baýyrjan Haliolla men Ahmetjan Ózbekov syndy óner maitalmandary qazylyq etti.
– Sońǵy jyldary Atyraý – aitystyń astanasyna ainaldy deýge bolady. Elde indetke qatysty shekteý sharalary, qiyndyqqa qaramastan Atyraý oblysy ákimi Mahambet Dosmuhambetovtiń qoldaýymen barlyq qaýipsizdik ustanymdary saqtala otyryp uiymdastyrylǵan aitys joǵary deńgeide ótti.
Memleket basshymyz «bul jyl – toi jarystyratyn emes, oi jarystyratyn jyl bolsyn» degen edi. Mine, osy sózge laiyqty sharapatty shara boldy. Ulttyń tarihyn túgendeitin, shamshyraǵyn anyqtaityn, Abaiǵa arnalǵan is-sharalardyń sátti qorytyndysy osy boldy dep oilaimyn, – dedi.
Óz kezeginde dúbirli dodada bas júlde ielengen Raýan Qaidarov:
– Eki kún boiy Jaiyqtyń jaǵasynda uly Abaidyń mereitoiyna arnalǵan úlken dúbirli doda ótti. Qazaqstannyń túkpir-túkpirinen kelgen 24 aqynnyń árqaisysy úlken óner kórsetti dep oilaimyn. Osyndai keremet rýhani kesh syilaǵan Atyraý halqyna, oblys basshylyǵyna zor alǵysymdy bildiremin, – dedi.
Jeńimpazdardy marapattaý saltanatyna arnaiy kelgen óńir basshysy Mahambet Dosmuhambetov uly Abaidy asqaqtatý arqyly – ulttyń óresi biiktep, rýhy asqaqtaitynyn atap ótti.
Sondai-aq, aimaq basshysy aityskerler men aitysqa qazylyq etken qazaq rýhaniiatynyń darabozdaryna óz rizashylyǵyn bildirdi.
– Uly Abai salǵan uly joldan jańylmai, qazaqtyń qasietti sóz ónerine qyzmet ete berińizder. Abai hákimniń shapaǵaty men sharapaty arada qansha ýaqyt ótse de halqyna molynan tiip jatyr. Taý alystaǵan saiyn biikteidi. Abai joly Alashty uly muratyna jetkizsin! – dedi oblys basshysy.
Aidyn KAKIMOV, Atyraý oblysy.
