Qazaqstannyń media keńistiginde birneshe sot isi qoǵam nazaryn aýdaryp otyr. Mádeniet jáne aqparat ministri Aida Balaeva atalǵan sot protsesterine qatysty pikir bildirip, sóz bostandyǵy men jýrnalister quqyǵy memleket nazarynda ekenin málimdedi, dep habarlaidy Dalanews.kz.
“Búginde Qazaqstannyń media keńistiginde birneshe sot protsesi ótýine bailanysty talqy júrip jatyr. QR Mádeniet jáne aqparat ministrligi bul protsesterdi, sonyń ishinde Orda.kz pen QazTAG-qa qatysty isterdi erekshe nazarda ustap otyr”, — dedi ol.
Aida Balaeva sóz bostandyǵynyń saqtalýy men aqparat taratatyn uiymdardyń zań aiasynda jumys isteýi mańyzdy ekenin atap ótti. Onyń sózinshe, kásibi jýrnalistika adaldyqqa, obektivtilikke jáne tekserilgen derektiń naqtylyǵyna súienýi tiis.
“Mundai jaǵdailar árdaiym media qaýymdastyqty alańdatady. Sebebi bul sóz bostandyǵy men zańdy jýrnalistik qyzmet sekildi asa mańyzdy máselelerge tikelei qatysty.
Kásibi buqaralyq aqparat quraldary zańdy buzbai jumys istegen jaǵdaida ǵana memleket olardyń quqyǵyn tiimdi qorǵai alatynyn túsinýi tiis. Al eger taraptar arasyndaǵy qatynastar quqyqtyq alańǵa aýyssa, memlekettik organnyń aralasýy sotqa qysym retinde qabyldanýy múmkin.
Qalai bolǵanda da, biz kásibi jýrnalisterge qatysty ákimshilik nemese qylmystyq isterdiń barynsha ashyq ári obektivti qaralýy qajet ekenin árdaiym talap etip kelemiz”, — dep qosty ol.
Sonymen birge ol jýrnalisterge qatysty ákimshilik jáne qylmystyq isterdiń barynsha ashyq ári obektivti qaralýy qajet ekenin qaitalap ótti.
“Jýrnalisterimizge qatysty isterdi tiisti organdar zań talaptaryn saqtai otyryp, jan-jaqty ári ádil qaraitynyna senimdimin.
Ministrlik óz quzyreti sheginde jýrnalisterdiń quqyqyǵyn qamtamasyz etýge jáne sot isteriniń ádil qaralýy úshin qajetti barlyq sharalardy qabyldaýǵa daiyn”, — dedi ol.
Aita keteiik, qysqa ýaqyt ishinde eki iri aqparat quraly – QazTAG HAA (halyqaralyq aqparat agenttigi) men Orda.kz – Qylmystyq kodekstiń 274-baby "kórineý jalǵan aqparat taratý" boiynsha qozǵalǵan isterdiń figýranttary boldy. Bul eki jaǵdai da sóz bostandyǵynyń shekarasy men jariialanǵan málimet úshin BAQ-tyń jaýapkershiligi týraly jańa pikirtalas týdyrdy.
