Qazaqstanda «Buqaralyq aqparat quraldary týraly» zańǵa ózgerister engizý usynyldy, dep habarlaidy Dalanews.kz Bes.media-ǵa silteme jasap.
Bastamaǵa sáikes, jýrnalister árbir jariialanym aldynda beineni paidalanýǵa qaitadan ruqsat alýǵa mindetti bolady. «Quqyqtyq media-ortalyq» qoǵamdyq qorynyń zańgeri Gúlmira Birjanovanyń pikirinshe, mundai ózgerister buqaralyq aqparat quraldary ókilderine qosymsha shekteý ákelýi múmkin.
Joba mátininde mass-media ónimi ázirlengende, jariialanǵanda, kóshirilip taratylǵanda kez kelgen adamnyń beinesin qoldaný tek sol adamnyń kelisimimen, al eger ol qaitys bolsa — muragerleriniń kelisimimen ǵana júzege asyrylatyny jazylǵan. Qoldanystaǵy zańda mundai talap joq.
Kelisim talap etilmeitin jaǵdailar:
-
adam kórermen retinde nemese qatysýshy retinde shoý, mádeni, áleýmettik mańyzy bar is-sharalar, sporttyq jarystar, beibit jinalystar jáne ózge de kópshilik sharalardy jariialaý kezinde kadrǵa tússe;
-
taratylatyn aqparat azamattyń qyzmettik jáne (nemese) qoǵamdyq qyzmetine qatysty bolsa jáne beine sol adamnyń ózi, onyń zańdy ókili nemese ýákiletti tulǵasy ashyq derekkózderde jariialaǵan jaǵdaida;
-
zańnamada kózdelgen tártippen konstitýtsiialyq qurylymdy qorǵaý, qoǵamdyq tártipti saqtaý, adamnyń quqyqtary men bostandyqtaryn, halyqtyń densaýlyǵy men imandylyǵyn qorǵaý úshin beineni paidalaný qajet bolsa.
Budan bólek, bastamashylar jýrnalisterdi beineni qoldanýdyń árbir jańa tásili úshin, sondai-aq beineni ózgertý, montajdaý, basqa sýrettermen biriktirý nemese oǵan túsinikteme qosý siiaqty árbir áreketke jeke kelisim alýǵa mindetteýdi usynyp otyr.
