قازاقستاندا «بۇقارالىق اقپارات قۇرالدارى تۋرالى» زاڭعا وزگەرىستەر ەنگىزۋ ۇسىنىلدى، دەپ حابارلايدى Dalanews.kz Bes.media-عا سىلتەمە جاساپ. 

باستاماعا سايكەس، جۋرناليستەر ءاربىر جاريالانىم الدىندا بەينەنى پايدالانۋعا قايتادان رۇقسات الۋعا مىندەتتى بولادى. «قۇقىقتىق مەديا-ورتالىق» قوعامدىق قورىنىڭ زاڭگەرى گۇلميرا ءبىرجانوۆانىڭ پىكىرىنشە، مۇنداي وزگەرىستەر بۇقارالىق اقپارات قۇرالدارى وكىلدەرىنە قوسىمشا شەكتەۋ اكەلۋى مۇمكىن.

جوبا ماتىنىندە ماسس-مەديا ءونىمى ازىرلەنگەندە، جاريالانعاندا، كوشىرىلىپ تاراتىلعاندا كەز كەلگەن ادامنىڭ بەينەسىن قولدانۋ تەك سول ادامنىڭ كەلىسىمىمەن، ال ەگەر ول قايتىس بولسا — مۇراگەرلەرىنىڭ كەلىسىمىمەن عانا جۇزەگە اسىرىلاتىنى جازىلعان. قولدانىستاعى زاڭدا مۇنداي تالاپ جوق.

كەلىسىم تالاپ ەتىلمەيتىن جاعدايلار:

• ادام كورەرمەن رەتىندە نەمەسە قاتىسۋشى رەتىندە شوۋ، مادەني، الەۋمەتتىك ماڭىزى بار ءىس-شارالار، سپورتتىق جارىستار، بەيبىت جينالىستار جانە وزگە دە كوپشىلىك شارالاردى جاريالاۋ كەزىندە كادرعا تۇسسە؛

• تاراتىلاتىن اقپارات ازاماتتىڭ قىزمەتتىك جانە (نەمەسە) قوعامدىق قىزمەتىنە قاتىستى بولسا جانە بەينە سول ادامنىڭ ءوزى، ونىڭ زاڭدى وكىلى نەمەسە ۋاكىلەتتى تۇلعاسى اشىق دەرەككوزدەردە جاريالاعان جاعدايدا؛

• زاڭنامادا كوزدەلگەن تارتىپپەن كونستيتۋسيالىق قۇرىلىمدى قورعاۋ، قوعامدىق ءتارتىپتى ساقتاۋ، ادامنىڭ قۇقىقتارى مەن بوستاندىقتارىن، حالىقتىڭ دەنساۋلىعى مەن يماندىلىعىن قورعاۋ ءۇشىن بەينەنى پايدالانۋ قاجەت بولسا.

بۇدان بولەك، باستاماشىلار جۋرناليستەردى بەينەنى قولدانۋدىڭ ءاربىر جاڭا ءتاسىلى ءۇشىن، سونداي-اق بەينەنى وزگەرتۋ، مونتاجداۋ، باسقا سۋرەتتەرمەن بىرىكتىرۋ نەمەسە وعان تۇسىنىكتەمە قوسۋ سياقتى ءاربىر ارەكەتكە جەكە كەلىسىم الۋعا مىندەتتەۋدى ۇسىنىپ وتىر.