Búgin Muhamedjan Tazabek Ortalyq kommýnikatsiialar qyzmetinde ótken baspasóz máslihatynda «Asyl arnany» jabatynyn, aldaǵy ýaqytta «Tálim TV» degen jańa arnanyń jumysyn qolǵa alatynyn aitty. Onyń aitýynsha, «Tálim TV» elimizdegi turmystyq, áleýmettik máselelerge qatysty baǵdarlamalar daiyndamaqshy.
Sońǵy jyldary elimizde dinge qatysty kóptegen máseleler týyndaǵany jasyryn emes. Munyń bári dini aqparattyq qaýipsizdigimiz durys qorǵalmaǵandyqtan oryn aldy. Ony moiyndaýymyz kerek.
Halyq dini aqparatqa muqtaj boldy. Jurt kókeige tunǵan saýalyna durys jaýap ala almai qinaldy.
Osylaisha, halyq dini aqparatqa sýsap turǵanda «Asyl arna» telearnasy ashylyp, jurttyń kózi ashylǵanyna kýá boldyq. Mine, sodan beri 10 jyl óte shyǵypty.
Endi Dini basqarmanyń janynan «Halyq arna» ashylyp, múftiiat dini baǵyttaǵy habar taratýdy tolyqtai óz qolyna aldy. Bul rette «Asyl arnanyń» bas direktory Dini basqarmanyń bastamasyn qup alyp, osyǵan deiin dini baǵytta habar taratyp kelgen «Asyl arnanyń» jumysyn toqtatyp, jańa jobany qolǵa alatynyn málim etti.
Osy rette Dini basqarma aqparattyq qaýipsizdikti qamtamasyz etip, dini baǵytta habar taratatyn telearnany 10 jyl buryn nege ashpady degen zańdy suraq týyndaidy. Biraq ol kezde Dini basqarmanyń budan da basqa jumystary jetip artylatyn. Aitalyq, dini kadrlardy daiarlaý, elimizdegi myńdaǵan meshitterdi qujattandyrý, dini oqý oryndaryn qurý syndy kóptegen mańyzdy jumystar kezegin kútip turdy. Osy qat-qabat jumystar basqarmanyń aqparattyq qaýipsizdik máselesimen ainalysýyna moiyn burǵyzbady.
Biraq sol kezde Muhamedjan Tazabek bastaǵan azamattar osy olqylyqtyń ornyn toltyryp, dini aqparattyq jumystarmen ainalysyp, «Asyl arna» qurdy.
«Asyl arna» qurylǵan kezde elimizde din máselesi óziniń apogeiine jetip turǵan edi. Sol tusta Muhamedjan Tazabekovtyń dini ustanymyna qatysty qoǵamdyq ortada túrli áńgime aityldy (ol áńgimeler áli de aitylýda).
Búgin ótken baspasóz máslihatynda da Tazabekke osy suraq tótesinen qoiyldy. Ol buǵan deiin aitqan jaýabyn, iaǵni Hanafi mashabynyń ustanymdaryn berik ustanatynyn aitty.
Muhamedjan Tazabek 10 jyl «Asyl arnany» basqarǵan tusta onyń bura tartyp, sáláfilerdiń ustanymyn nasihattaǵanyn estigen de, kórgen de emespiz.
Aitpaqshy, «Asyl arna» qurylǵan kúnnen bastap, arnada shyǵatyn habarlardyń bári Dini basqarmanyń qatań baqylaýynda bolǵanyn bilemiz. Biraq osy ýaqyt aralyǵynda taraptardyń qandai da bir másele boiynsha «túsinispei qalypty» degen áńgimeni estimedik.
Moiyndaýmyz kerek, «Asyl arna» 10 jyldyq jumysy barysynda milliondaǵan kórermenderdi qalyptastyrdy. Temirdi qyzǵan kezinde soq degendei, dál ýaqytynda ashylyp, qalyń buqaraǵa durys dini aqparatty taratty.
Osylaisha Muhamedjan Tazabekov qazaq tilinde sapaly media resýrs ashý múmkin emes degen syńarjaq pikirdi buzdy. Búginde din jolynda júrgen jýrnalister jeterlik, solar nege osy baǵytta jumys istemedi? Mundai jumysqa táýekel etý úshin din salasyn jetik bilý jetkiliksiz. Telearna qurýǵa táýekel etken adam bilikti menedjer bolýy shart.
Sondyqtan qiyn kezeńde jyrtyǵymyzǵa jamaý bolǵan, Muhamedjan Tazabekovtyń jumysyn úlken erlikke baǵalamasaq ta, laiyqty baǵasyn beretin kez jetti dep esepteimiz.
Osy rette bizder Muhamedjan Tazabektiń jeke basyna shuqshiia bermei, onyń telearna salasyndaǵy menedjerlik qyzmetine de bir aýyq mán berip, sol jaiynda áńgime qozǵaǵan jón.
Tazabek óziniń qolynda zor aqparattyq resýrs turǵanda jurtty ekige jardy ma? Jarǵan joq. «Asyl arnanyń» efirinen shyǵatyn habarlarda sáláfilik ustanymǵa sáikes qandai da bir elementter bolsa, ol sol kúni sý betine qalqyp shyǵar edi. Biraq mundai oqiǵa bolǵan joq.
Sondyqtan dini aqparattyq qaýipsizdiktiń qabyrǵasy sógilip turǵanda, joq-jitigimizdi túgendep, úlken iske táýekel etken Tazabekke alǵys aitpasaq, qarǵys aitpaiyq, aǵaiyn.
Muhamedjan Tazabek áleýmettik jelimen de belsendi jumys istedi. Búginde Tazabektiń ár posty úlken talqylaýǵa ulasady. Mundaida Muhańnyń ózin bir telearna dersiń. Telearna basshylary degende aldymen Muhamedjannyń esimi aýyzǵa iligedi. Nege? Óitkeni ol áleýmettik jelide tanymal. Jalpy, kez kelgen media resýrstyń basshysy daý-shardan qashpai, qainaǵan aqparattyń bel ortasynda júrýi kerek qoi. Sondyqtan aldaǵy ýaqytta onyń aqparattyq salada tiimdi jumys isteitin menedjer ekenin taldap aityp, eldik maqsatqa barynsha paidalanýymyz kerek. Osy rette Muhamedjan Tazabektiń «Tálim TV» jobasyn qolǵa alyp, aqparattyq saladan uzap ketpegeni qýantty.
