Jýrnalist Lýkashenkony batpaqqa batqan siyrǵa teńedi
Onyń batpaqqa batqany da qyzyq. Áýeli kúrish basyn tilimen orap kúisep júrip tizesine deiin sý keship ketkenin baiqamaidy. Óitkeni mundai dámdi qorekti buryn jep kórmegen. Sondyqtan kózi alaqtap, jalmap, jaipai beredi.
Sóitip júrip baýyryna deiin uiyqqa kirip ketkenin kesh baiqaidy. Baiqaǵan bette batpaqtan shyqpaq bop, jantalasa bastaidy. Onyń osy jantalasqany óziniń sory. Jantalasqan saiyn tereńge shym-shymdap ene betedi, ene beredi.
Eger osy kez tam-tyrys tura qalsa, batpas edi, adamdar kelip qutqaryp alar edi. Biraq siyr sorlynyń oǵan jeter aqyly káne. Óziniń áreketi óziniń basyn jalmap jutady.
Biliktiń ushar basynda júrgenderdiń de hali batpaqqa batqan sol siyrdan aýmaidy.
Bilikke basyn suqqandardyń aman shyǵýy qiyn. Shyǵar edi, ornyn berip, tynysh qana keter edi, biraq kete almaidy. Kete almaityny sol, erteńine-aq dar aǵashynyń aldynda turatynyn jaqsy biledi. Óitkeni biligin saqtap qalý úshin qarsylasyna qylmaǵany qalmaǵan.
Bireýge tyrnaǵy batqan, endi bireýdi tepkige alǵan. Myjyp ótken, taptaǵan. Tiri qalǵandary qarsy shyqqanda basyn qorǵap áreket etken. Áreket etken saiyn álgi siyr siiaqty batpaqqa bata bergen. Osylaisha jyldar boiǵy jantalasqan áreketi óz basyna pále bolyp úiilip qalǵan. Qara batpaqtan shyǵa almaityndai jaǵdaiǵa jetken.
Bilikten der kezinde ketip qalmaǵan adamnyń kóretini osy. Der kezinde kete almaýdyń ózi qasiret.
Osy kúnderi eldiń eleńdep tyńdaityny Lýkash týraly áńgime bolsa, onyń keiingi kezdegi áreketteri batpaqqa batqan álgi siyrdyń jantalasyna uqsaidy. Budan buryn memleket basshysyn ornynan taidyryp kórmegen halyqqa bunyń bári tyń jańalyq. Prezidentti de ornynan julyp alyp tastaýǵa bolatynyna halyqtyń kózi jetip keledi. Muqańnyń talmai aityp júrgeni de osy ǵoi.
Lýkash tragediialyq tulǵa. Tek ol ǵana ma, bári solai. Onyń ishinde TMD elderiniń basshylary bir izben, bir úlgimen keledi. Kelýin qaidam, ketýi uqsas. Halyqtan alǵys alyp jatqan bireýi kórinbeidi.
«Jibekti túte almaǵan jún etedi» demekshi, bular bilikti demokratiiaǵa emes, qara batpaqqa ainaldyryp alǵan. «Dúnieniń basy sairan, aiaǵy oiran» degen sóz de osyǵan kelip tur.
Dál qazir Lýkashtyń aýzynan ne sóz shyqsa, sol sózi basyna pále bolyp jatyr. Batpaqqa batyp óletin siyrdyń hali túsip tur basyna.
Budan eshkim qutyla almaidy. Barlyǵy da batpaqqa batqan siyrdyń kebin kiip tynady.
Nurlybek SAMATULY
