Jýrnalist Aidos Sadyqovqa qastandyq jasaǵan kúdiktiler ustaldy. Bul týraly jýrnalistiń jary Natalia Sadyqova habarlady, - dep habarlaidy Dalanews.kz.
Onyń sózinshe, politsiia Aidos Sadyqovqa qastandyq jasaǵan eki adamdy ustaǵan. Kúdiktiler - Qazaqstannyń eki azamaty bolyp shyqqan. Ekeýi de bireýdiń tapsyrysyn oryndaǵan.
Eki kúdikti 2 maýsymda Kievke kelip, páter jaldap turyp, Aidos Sadyqovty ańdyp júrgen.
Natalia Sadyqovanyń sózinshe, kúdiktilerdiń biri - Qostanai oblysynyń Ishki ister departamentiniń qyzmetkeri eken.
Artynsha Qazaqstannyń Ishki ister ministrligi Meiram Qarataev 2019 jyldyń qańtar aiynda ishki ister organdarynan bosatylǵanyn jáne qazirgi ýaqytta politsiia qyzmetkeri emes ekenin habarlady.
"Elimizde Zań ústemdigin nyǵaityp jatyrmyz, iaǵni barlyq salada, eń aldymen, Zań ústemdigin qamtamasyz etý – basty mindet. Bul másele boiynsha meniń kózqarasym – aiqyn. Muny ózderińiz de jaqsy bilesizder. Qazaqstanda Zań men tártip bárinen biik turýǵa tiis. Sondyqtan qoǵamdaǵy barlyq qarama-qaishylyqtar men kelispeýshilikterdi tek qana quqyqtyq turǵydan, iaǵni tiisti Zańnamaǵa jáne negizgi halyqaralyq normalarǵa sáikes sheshý qajet. Keshe Qazaqstan azamaty Aidos Sadyqovqa qatysty Kievte bolǵan qylmysqa da dál osy ustanym turǵysynan qaraǵan jón. Men diplomatiialyq arnalar men quqyq qorǵaý organdary arqyly osy oqys oqiǵa boiynsha Ýkraina tarapyna resmi suratýlar jiberý týraly naqty tapsyrma berdim. Sondai-aq qajet bolǵan jaǵdaida Qazaqstannyń resmi organdary istiń aqiqatyna jetýge járdem berý úshin tergeý jumysyna qatysýǵa daiyn ekenin aitqym keledi", – dedi Prezident.
Sonymen qatar,depýtat Ermurat Bapi Aidos Sadyqovqa jasalǵan shabýylda Qazaqstan únsiz qalmaýy keregin jetkizgen edi.
