جۋرناليست ايدوس سادىقوۆقا قاستاندىق جاساعان كۇدىكتىلەر ۇستالدى. بۇل تۋرالى ءجۋرناليستىڭ جارى ناتاليا سادىقوۆا حابارلادى، - دەپ حابارلايدى Dalanews.kz.
ونىڭ سوزىنشە، پوليسيا ايدوس سادىقوۆقا قاستاندىق جاساعان ەكى ادامدى ۇستاعان. كۇدىكتىلەر - قازاقستاننىڭ ەكى ازاماتى بولىپ شىققان. ەكەۋى دە بىرەۋدىڭ تاپسىرىسىن ورىنداعان.
ەكى كۇدىكتى 2 ماۋسىمدا كييەۆكە كەلىپ، پاتەر جالداپ تۇرىپ، ايدوس سادىقوۆتى اڭدىپ جۇرگەن.
ناتاليا سادىقوۆانىڭ سوزىنشە، كۇدىكتىلەردىڭ ءبىرى - قوستاناي وبلىسىنىڭ ىشكى ىستەر دەپارتامەنتىنىڭ قىزمەتكەرى ەكەن.
ارتىنشا قازاقستاننىڭ ىشكى ىستەر مينيسترلىگى مەيرام قاراتايەۆ 2019 جىلدىڭ قاڭتار ايىندا ىشكى ىستەر ورگاندارىنان بوساتىلعانىن جانە قازىرگى ۋاقىتتا پوليسيا قىزمەتكەرى ەمەس ەكەنىن حابارلادى.
"ەلىمىزدە زاڭ ۇستەمدىگىن نىعايتىپ جاتىرمىز، ياعني بارلىق سالادا، ەڭ الدىمەن، زاڭ ۇستەمدىگىن قامتاماسىز ەتۋ – باستى مىندەت. بۇل ماسەلە بويىنشا مەنىڭ كوزقاراسىم – ايقىن. مۇنى وزدەرىڭىز دە جاقسى بىلەسىزدەر. قازاقستاندا زاڭ مەن ءتارتىپ بارىنەن بيىك تۇرۋعا ءتيىس. سوندىقتان قوعامداعى بارلىق قاراما-قايشىلىقتار مەن كەلىسپەۋشىلىكتەردى تەك قانا قۇقىقتىق تۇرعىدان، ياعني ءتيىستى زاڭناماعا جانە نەگىزگى حالىقارالىق نورمالارعا سايكەس شەشۋ قاجەت. كەشە قازاقستان ازاماتى ايدوس سادىقوۆقا قاتىستى كييەۆتە بولعان قىلمىسقا دا ءدال وسى ۇستانىم تۇرعىسىنان قاراعان ءجون. مەن ديپلوماتيالىق ارنالار مەن قۇقىق قورعاۋ ورگاندارى ارقىلى وسى وقىس وقيعا بويىنشا ۋكراينا تاراپىنا رەسمي سۇراتۋلار جىبەرۋ تۋرالى ناقتى تاپسىرما بەردىم. سونداي-اق قاجەت بولعان جاعدايدا قازاقستاننىڭ رەسمي ورگاندارى ءىستىڭ اقيقاتىنا جەتۋگە جاردەم بەرۋ ءۇشىن تەرگەۋ جۇمىسىنا قاتىسۋعا دايىن ەكەنىن ايتقىم كەلەدى"، – دەدى پرەزيدەنت.
سونىمەن قاتار،دەپۋتات ەرمۇرات باپي ايدوس سادىقوۆقا جاسالعان شابۋىلدا قازاقستان ءۇنسىز قالماۋى كەرەگىن جەتكىزگەن ەدى.
