Reseidiń Joǵary ekonomika mektebinde oqyp jatqan qazaqstandyq stýdent Kristina Dýmanova Resei Ishki ister ministrligine ashyq úndeý jariialap, "baqylaýdaǵy tulǵalar reestrine" zańsyz engizilgeni úshin bir ai boiy zardap shegip jatqanyn málimdedi, dep habarlaidy Dalanews.kz.
Onyń aitýynsha, bul júieniń maqsaty zańsyz migranttarmen kúresý bolsa da, qazir ol kerisinshe, barlyq qujaty durys, elde zańdy júrgen sheteldikterge ziianyn tigizip otyr.
Kristina Dýmanova bul jazbasyn Reseidiń ishki ister ministrligine arnaitynyn atap ótti. Ol vedomstvo engizgen "baqylaýdaǵy tulǵalar reestri" 2025 jyldyń aqpanynan bastap jumys istei bastaǵanyn atap ótti.
"Bul tizimge, negizinen, tirkeýinde qate bar sheteldikter engizilýi tiis bolatyn. Alaida shyn máninde júie kez kelgen adamdy kezdeisoq tirkep jatyr. Tipti zań buzbaǵandardy da tirkep tastaǵan", – dep jazady stýdent.
Ol bul júie zańsyz migranttardy anyqtap, shekteý úshin qurylǵanyn túsinetinin aitady. Biraq sonyń saldarynan qujattary zańdy, tirkeýi tolyq, bári durys shetel azamattarynyń ómiri qiyndap ketken.
"Men – Qazaqstan azamatymyn. Qazaqstan – Reseidiń dostas eli. Reseide bes jyldan beri turyp, Joǵary ekonomika mektebinde oqyp kelemin. Reseide jumys isteimin, salyq tóleimin, qujattarym da túgel", – deidi Kristina.
Soǵan qaramastan, stýdent sońǵy bir ai ishinde bul tizimge úshinshi ret engizilgenin habarlady. Alǵash ret ol 30 mamyrdan 18 maýsymǵa deiin tizimde bolǵan. Sol ýaqytta ýlanyp qalyp, bir apta tósek tartyp jatyp qalǵanyn, tipti dárihanadan dári de ala almaǵanyn aitady.
"Sebebi tizimge engizilgenderdiń barlyq bank kartalary buǵattalady. Bul – zańdy júrgen sheteldikke qarsy jasalǵan qysym", – deidi ol.
18 maýsym kúni ony tizimnen shyǵarǵan, alaida bar bolǵany bir kúnge ǵana. 21 maýsymda qaitadan aýdandyq ishki ister bólimine baryp, taǵy shyǵaryp tastaýdy suraidy. Al 25 maýsym keshke onyń aty úshinshi ret reestrge engizilgeni belgili bolady.
"IIM ókilderi túsinikteme bermeidi. Júie durys jumys istemeidi, ázirge solai bolady dep jaýap beredi. Demek men endi árbir birneshe kún saiyn ishki ister basqarmasyna baryp, tizimnen shyǵarýymdy surap júrýge májbúrmin", – deidi Kristina.
Kartalardyń jumys istemei qalýy – jalǵyz másele emes. Kristinanyń aitýynsha, RKL-de turǵan sheteldikti jumysqa alýǵa bolmaidy. Bul jumys berýshige iri aiyppul salýǵa ákep soǵady.
"Men armandaǵan jerden jumys usynysyn aldym. Alaida jumys berýshim meni jumysqa ala almaidy – sebebi men baqylaýdaǵy tizimdemin. Al jumys berýshi meni jumysqa alsa, zań boiynsha úlken aiyppul tóleidi", – deidi ol.
Kristina IIM-nen bul jaǵdaidyń júiedegi aqaýdan ekenin túsindiretin resmi anyqtama suraǵan. Biraq aýdandyq bólim bul anyqtamany berýden bas tartqan, tek "Memlekettik qyzmetter" portaly arqyly ótinish berýdi usynǵan. Qazir ótinishi 21 maýsymnan beri qaralyp jatyr.
Osy shekteýlerdiń saldarynan Kristina jumysqa kirise almai, aldyn ala kelisilgen jalaqysynan aiyrylǵan. Buǵan qosa, tipti bul jumys ornynan tolyq aiyrylyp qalýy da múmkin ekenin moiyndaidy.
"Meni birneshe kún saiyn qaita engizip-shyǵaryp otyrady. Jumys berýshi meni tirkeýge tipti úlgermeidi. Al meniń kinám joq", – deidi ol.
Qorytyndylai kele Kristina Dýmanova úndeý jasady.
"Men – dostas eldiń azamaty, Reseidiń úzdik ýniversitetinde oqyp jatqan stýdentpin. Bir ai boiy banktik kartam buǵattalǵan, jumysqa tura almai júrmin, qarapaiym ómir súrýge múmkindik joq. Meni júieniń aqaýynan esh negizsiz "baqylaýdaǵy tulǵalar tizimine" engizdi. Endi árbir birneshe kún saiyn baryp, tizimnen shyǵarýymdy suraýǵa májbúrmin", – dep jazdy qazaqstandyq stýdent.
