Kentaý qalasynda jumysshy mamandyqtardy daiyndaityn Kentaý politehnikalyq kolledji bar. Oqý orny 2011 jyly Kentaý transformator zaýytynyń negizinde qurylǵan. Sondai-aq, «Alageum Electric» kompaniiasynyń qurylymdyq bóligi. Búginde kolledj qabyrǵasynda 11 mamandyq boiynsha 800-den astam stýdent bilim alady. Búgin jumysshy mamandyqtar jyly aiasynda atalǵan kolledjde BAQ ókilderine arnalǵan baspasóz týry ótti,- dep habarlaidy Dalanews.kz
Týr aiasynda jýrnalister oqý ornyndaǵy elektroenergetika, avtomattandyrý, IT, mehatronika, jańartylatyn energiia kózderi jáne 3D-modeldeý baǵyttaryndaǵy sheberhanalaryn aralady. Sonymen qatar, kolledj ǵimaratynda jańa tehnikalyq qural-jabdyqtarmen qamtamasyz etilgen oqý kabinetterine bardy. Onda stýdentterdiń innovatsiialyq jobalarymen tanysty. Kabinetter kompiýterlermen, interaktivti taqtalarmen qamtamasyz etilgen.
Kolledj kitaphanasynda zamanaýi jalpy tehnikalyq, salalyq jáne kórkem ádebi oqýlyqtardyń 13 myńǵa jýyq qory bar. Budan bólek, negizgi quraldardyń biri «Smartnation» platformasy. Bul - stýdentter men oqytýshylar úshin ashyqtyq pen yńǵailylyqty qamtamasyz ete otyryp, oqý protsesterin avtomattandyrýǵa múmkindik beredi.
Tilshiler press-týr aiasynda «Kentaý transformator zaýyty» AQ óndiristik alańyna baryp, elimizdiń jetekshi kásiporyndarynda eńbek etip júrgen túlektermen kezdesti.
Óndiris ornynyń basty ereksheligi – ónimderin zamanaýi qondyrǵylar negizinde jasap shyǵarady. Kolledjde oqý protsesiniń alǵashqy kúnderinen-aq stýdentterge zaýyttyń óndiristik oryndarynda tájiribeden ótýge múmkindik beriledi. Nátijesinde stýdentter bir mezgilde teoriialyq ári praktikalyq bilim alady. Qazirgi tańda kolledjdi 2 myńǵa jýyq túlek támamdap, túrli kásiporyndar men uiymdarda jumys istep júr.
Aita keteiik, atalǵan oqý orny - Qazaqstandaǵy TOP-10 úzdik kolledjderdiń qatarynda. Bilim ordasy Túrkistan oblysynyń bilim berý salasyndaǵy jetekshi oqý oryndarynyń biri. Onda óndiris, innovatsiia jáne tájiribege baǵyttalǵan oqytý júiesi tiimdi júzege asyrylady. Kolledj energetika, mashina jasaý, IT, jańartylatyn energiia kózderi jáne basqa da salalarda joǵary suranysqa ie mamandardy daiarlaidy.
