Almaty qalasynyń ákimi Darhan Satybaldy Áýezov aýdanyndaǵy Jastar komiýniti-ortalyǵyna baryp, jastarmen emen-jarqyn kezdesý ótkizdi,- dep habarlaidy Dalanews.kz
Júzdesýdiń negizgi ózegi jumys tabý, kásibi damý, qalalyq jáne ekologiialyq bastamalarǵa qatysý máseleleri boldy.
Ashyq dialog barysynda belsendi jastar tyń ideialaryn bólisti, oiǵa alǵan jobalary týraly aityp, jastardy qoldaýdyń jańa formattaryn usyndy. Olar suranysqa ie mamandyqtar boiynsha qysqa merzimdi oflain-kýrstardy iske qosý, «Taza Qazaqstan» ekologiialyq aktsiiasyna qatysý, jas muǵalimder men dárigerlerdi ýaqyt talabyna sai ózekti soft skills-ke oqytý syndy máselelerdi kóterdi.
Kezdesý barysynda aldaǵy 12 tamyzda atap ótiletin Halyqaralyq jastar kúnine daiyndyqqa erekshe nazar aýdaryldy. Almatyda jastardy áleýmettik mańyzy bar qyzmetke tartýǵa, olardyń kóshbasshylyq qasietterin damytýǵa jáne belsendi azamattyq ustanymyn qalyptastyrýǵa baǵyttalǵan birqatar is-shara josparlanýda.
Shahar basshysy jastardyń óz kózqarasyn, azamattyq ustanymyn erkin tanytýǵa jáne olardyń qalanyń damýyna óz úlesin qosýyna qolaily jaǵdai jasaýǵa múmkindik beretin «jastar qatysatyn biýdjet» tetigin ázirleýdi tapsyrdy.
«Búginde Almatyda 700 myńnan astam jas turady. Olardyń árqaisysynyń sapaly bilimge, kásibi jáne shyǵarmashylyq damýyna qol jetkizýin qamtamasyz etý, olardyń áleýetin iske asyrý – bizdiń ortaq mindetimiz», – dep atap ótti Almaty ákimi Darhan Satybaldy.
Qala basshysy kezdesýde aitylǵan barlyq usynys muqiiat qaralyp, zerdelenip, múmkindiginshe iske asyrylatynyn atap ótti. Jastardyń damýy úshin jaǵdai jasaý – qala saiasatynyń basym baǵyttarynyń biri.
Búgingi kúni qalada 11 komiýniti-ortalyq jumys isteidi. Onda jastar psihologiialyq jáne zań kómeginen bastap, kásiptik baǵdar alýǵa, tildik kýrstar men memlekettik baǵdarlamalar boiynsha konsýltatsiialarǵa deiin tegin qyzmet alady. Atalǵan qaýymdastyqtar qalanyń jas turǵyndarynyń múmkindigin, darynyn ashýǵa, kez-kelgen bastamalaryn qoldaýǵa daiyn, esigi árqashan ashyq zamanaýi ortalyqqa ainalyp keledi.
