QR Premer-mınıstriniń orynbasary — Ulttyq ekonomıka mınıstri Serik Jumanǵarın "Báıterek" UBH dırektorlar keńesiniń quramyna alyndy. Kerisinshe, holdıńtiń dırektorlar keńesinen eks-mınıstr Nurlan Baıbazarov shyǵaryldy, dep jazady Dalanews.kz.

Eske sala ketsek, 2024 jyldyń jeltoqsan aıynyń ortasynda (qarasha aıynyń sońyndaǵy teńge devalvasıasynan soń) Qazaqstan Prezıdentiniń Jarlyǵymen Nurlan Baıbazarov QR Premer-mınıstriniń orynbasary — Ulttyq ekonomıka mınıstri laýazymynan bosatylǵan edi. İle-shala onyń ornynan Serik Jumanǵarın basty. Soǵan qaraǵanda "Báıterektegi" aýys-túıis te sol kezdegi kadrlyq ózgeristiń jalǵasy ispetti.

Jalpy, ulttyq basqarý holdıńtiń dırektorlar keńesi 10 adamnan turady. Olardyń qatarynda Jumanǵarınnen bólek Úkimet basshysy Oljas Bektenov, QR Prezıdentiniń keńesshisi Erulan Jamaýbaev, QR Premer-mınıstriniń birinshi orynbasary Roman Sklár, Qarjy mınıstri Mádı Takıev, Ónerkásip jáne qurylys mınıstri Qanat Sharlapaev, "Báıterek" UBH basqarma tóraǵasy Rýstam Qaraǵoıshın jáne úsh rezıdent emes tulǵa bar: Danıel A.Vıtt, Merı-Elena Berar jáne Manfred Grýndke.

2024 jyldyń 1 qazanyndaǵy jaǵdaı boıynsha UBH-nyń jaı aksıalarynyń 100%-y QR QM Memlekettik múlik jáne jekeshelendirý komıtetiniń ıeliginde bolyp tabylady. 

Aıta ketsek, Qazaqstan ekonomıkasynyń betke ustar – ulttyq kompanıalarynyń rentabeldiligi men tabysy bıyl, ıaǵnı 2024 jyldyń boıynda tek tómendeýmen bolǵan. Sarapshylar bul ulttyq kompanıalardy basqarýshy "Báıterek" holdıńiniń jáne onyń jalǵyz aksıoneri Úkimettiń olqylyǵy bolýy kerek dep sanaıdy. Osy jaǵynan alǵanda, jyl sońynda Ulttyq ekonomıka mınıstri Nurlan Baıbazarovtyń qyzmetinen ketýi kezdeısoqtyq emes ekeni aıtylǵan. Bul týraly saıtymyzdaǵy "Ulttyq kompanıalarǵa ne bolǵan? Depýtattar nege únsiz" degen maqaladan oqyp-bile alasyzdar. Sondaı-aq osy taqyryppen baılanysty "Maman antırekord tirkegen TSHI-ǵa qatysty Úkimette esh saspaıtyndar baryn aıtty" degen maqalamen de tanyssańyzdar bolady. Iá, Ulttyq bank derekterine sáıkes, Qazaqstan ekonomıkasyna tartylǵan jalpy tikeleı sheteldik ınvestısıalar (TSHI) kólemi de 2024 jyldyń 9 aıynda qatty tómendegen...