Oqý-aǵartý ministri Juldyz Súleimenova jańa Konstitýtsiia jobasynyń kópshilikke usynylýyn eldiń saiasi jáne quqyqtyq damýy úshin mańyzdy kezeń dep baǵalady, dep habarlaidy Dalanews.kz.
Ministrdiń aitýynsha, jańa Konstitýtsiia jobasynyń ázirlenýi Memleket basshysy Qasym-Jomart Toqaevtyń Parlamenttiń birpalataly modeline kóshý jónindegi bastamasyna negizdelgen.
«Barshańyzǵa belgili jańa Konstitýtsiiasynyń jobasy kópshilikke usynyldy. Bul – elimizdiń saiasi jáne quqyqtyq damýynyń jańa kezeńin aiqyndaityn mańyzdy qadam», – dep jazdy Juldyz Súleimenova.
Ol konstitýtsiialyq reformalarǵa daiyndyq aiasynda jarty jylǵa jýyq ýaqyt saraptamalyq jumys júrgizilip, qoǵamdyq talqylaý ótkenin atap ótti. Ministrdiń sózinshe, osy protsestiń nátijesinde ózgeristerdiń aýqymy men tereńdigi eskerilip, jańa Konstitýtsiia qabyldaý týraly sheshim qabyldanǵan.
«Jarty jylǵa jýyq júrgizilgen saraptamalyq jumys jáne qoǵamdyq talqylaý nátijesinde, ózgeristerdiń aýqymy men tereńdigin eskerip, jańa Konstitýtsiia qabyldaý týraly sheshim engizildi», – dedi ol.
Juldyz Súleimenova Konstitýtsiia jobasynda Ádilettilik, Zań men Tártip, sondai-aq tabiǵatqa jaýapkershilikpen qaraý qaǵidattary negizgi deńgeide bekitiletinin aitty. Sonymen qatar bilim, ǵylym, mádeniet pen innovatsiiaǵa basymdyq berý adam kapitalyna negizdelgen zamanaýi memlekettiń baǵytyn aiqyndaitynyn jetkizdi.
Ministrdiń jazbasynda qujattyń ózeginde adam, onyń qadir-qasieti, quqyqtary men jeke jaýapkershiligi turǵany da atap ótilgen.
«Qujattyń ózeginde – ADAM, onyń qadir-qasieti, quqyqtary men jeke jaýapkershiligi qarastyrylǵan. Dástúr, birlik pen rýhani qundylyqtar qoǵamnyń ornyqty damýynyń negizi retinde aiqyndalǵan», – dedi Súleimenova.
Sondai-aq jańa Konstitýtsiia jobasynda memlekettiń zaiyrly sipaty jáne nekeniń er men áieldiń teń quqyqty, erikti odaǵy retinde tanylýy naqtylanǵan.
«Bul – otbasy institýtyn, áielderdiń quqyqtaryn jáne urpaqtar sabaqtastyǵyn qorǵaýǵa baǵyttalǵan mańyzdy norma dep sanaimyn», – dep atap ótti ministr.
Juldyz Súleimenova Konstitýtsiia jobasynyń basty ereksheligi onyń ashyq ári keń qoǵamdyq dialog aiasynda daiyndalǵanyn aitty. Onyń sózinshe, Konstitýtsiialyq komissiianyń jumysy tikelei efirde, ashyq formatta ótken.
