J.Túimebaev: «Safari Shardara» dástúrli sharaǵa ainalýy tiis»
Shardara aýdanyna ótken halyqaralyq «Safari Shardara» sharasynda sporttyq saiystar men kontserttik baǵdarlamalar qatar uiymdastyryldy. Festivalde alǵash bolyp sóz alǵan oblys ákimi Janseiit Túimebaev aitýly sharanyń óńirde tuńǵysh ret uiymdastyrylyp jatqanyn tilge tiek etip, saiysqa qatysýshylar men qonaqtardy quttyqtady.
– Elbasymyz «Bai tabiǵatymyz ben mádeni áleýetimizdi paidalaný úshin syrttan keletin jáne ishki týrizmdi damytýǵa erekshe kóńil bólý qajet» dep atap ótkendei, bolashaqta Qazaqstanda týrizm óńirlik ǵana emes, jahandyq sipat alýy kerek. Elimizdegi týrizmniń órkendeýi úshin tarihi jáne týristik oryndarymyzdy laiyqty damyta bilsek, memlekettik biýdjet tolyǵyp, áleýmettiń ál-aýqaty kóteriledi. Búgin bastalǵan «Safari Shardara» festivali - kórshi elderge Qyzylqum men Shardara sýqoimasynyń jaǵalaýy syndy jaýharlarymyzdy tanytatyn shara bolmaq. Sondai-aq, biz osy is-shara arqyly shaǵalaly Shardarada jelkendi qaiyq sporty men at pen túie jarys, qusbegilik syndy ulttyq sport túrleri men ózge de ata kásipterimizdi jańǵyrtýdy kózdep otyrmyz. Munyń barlyǵy óńirdegi týrizmdi damytyp, biznes axýaldy kóterýge baǵyttalǵan, – dedi Janseiit Qanseiituly.
Sonymen qatar, oblys basshysy óńirde buǵan deiin Túlkibas aýdanynda ótken “Qyzǵaldaq”, Báidibektegi “Qymyzmuryndyq”, Jetisaidaǵy “Qaýynfest” festivaldarynyń mańyzdylyǵyna toqtaldy.
«Aýqymdy is-sharalar arqyly aýdannyń bolashaǵy úshin mańyzdy brendterin elge áigili etýdi maqsat tuttyq. Biyl igi bastamalardy bastap berdik, endi isker jigitter, jergilikti kásipkerler, aýdannyń atpal azamattary osy oilardy jalǵastyryp áketip, ary qarai dástúrli sharaǵa ainaldyrýy tiis”, – dedi Janseiit Túimebaev.
Shara aiasynda oblys ákimi saiysta úzdik bolǵan birqatar sportshylardy marapattap, syi-syiapat jasady. Keiin festival «djip» kólikteriniń jarysymen jalǵasyp, qumda kompozitsiialyq ROCK RACING shoýy kórsetildi. Dúbirli jarys túieler saiysymen qyza tústi. Onda 15 túieshi baq synap, ózara myqtyny anyqtady. Aitýly sharaǵa kelgen qonaqtar odan soń saiatshylardyń halyqaralyq jarysyna kýá boldy.
Túrkistan óńiriniń týristik áleýetin arttyrýǵa arnalǵan halyqaralyq shara kontserttik baǵdarlamamen aiaqtaldy.
Túrkistan oblysy ákiminiń baspasóz qyzmeti
