Elimizde aqsha aiyrbas oryndary dollar satyp alǵysy keletin azamattarǵa, kóbinese eski kýpiýradaǵysyn ótkizýge tyrysady eken. Al onymen shetelge shyqsańyz, bittim dei berińiz. Óitkeni, keibir memleketter eski dollardy qabyldamaidy, dep jazady Dalanews.kz.
Mundai jaǵdaimen, eń birinshi ret, basynda shetelde júrgen reseilik azamattar betpe-bet kelgen. "Reseilikter dollaryn ótkize almai nege álek" dep maqala da jazǵan bolatynbyz sol kezde. Jalpy, jaz aiynan bastap Reseide dollar banknotyn ótkizý qiyndaǵan.Reseilikterdiń tek el ishinde ǵana emes, shetelde de amerikalyq valiýtany ótkize almai áýrege túsip jatatyn kezderi bolady. Shetelde bul rette "aqshań myjylyp qalǵan" nemese osyǵan uqsas taǵy basqa sebepterdi alǵa tartatyn kórinedi. Buǵan qatysty túsinikteme bergen RF Qarjy ministrligi "bul arada másele amerikalyq valiýtada emes, Resei azamattyǵynda ekenin" aitqan. Vedomstvo bul túrimen shetel bankteri alda Resei azamattaryna qyzmet kórsetýdi múlde doǵarýy múmkin dep topshylaidy. Sol sebepti ministrliktiń ózi el azamattaryna dollardy rýblge aiyrbastap, al jinaqty bank depozitinde saqtaýǵa keńes bergen. Bul Reseige qatystysy.
Al jaqynda Túrkiiada da eski dollardy esh jer qabyldamaityny belgili boldy. Bastapqyda, 2003 jáne 2006 jyldary shyqqan 100 jáne 50 dollarlyqtar "kereksiz bolsa", endi 2009 jylǵysyna da kóshken. Túrkiianyń Ortalyq banki muny elde jalǵan aqshalardyń kóbeiip ketýimen túsindiredi.
Bizde dollar qymbattaǵanda "Qazaqstandy aqsha aiyrbas ornyna ainaldyrdy" degen aiypqa ushyraǵan reseilikter "eskisin" sol kezde bizge "tyqpalap ketti me", bir Qudai bilsin?! Biletinimiz, aqsha aiyrbas oryndarynda búginderi jańa dollar tapshy bola bastaǵan.
"Birneshe kún boldy, dollar satyp ala almai júrmin. Aqsha aiyrbas oryndarynda dollar joq emes, bar, biraq kóbisi eski 100 dollarlyqtardy usynady. Al men ushyp bara jatqan elde eskini qabyldamaidy nemese arzanǵa alady, bul ózi ǵalamdyq qubylys…", dep jazypty ekonomist Oljas Baidildinov óz arnasynda.
Sóitken ol bul másele sheshimine quzyrly organdardyń nazaryn aýdartady.
Al KASE-de dollar quny áli tómendep jatyr. 1 AQSh dollarynyń tańerteńgi resmi baǵamy 510,08 teńge bolsa, al keshki sessiiada ol 1,50 teńgege taǵy arzandap, 508,05 teńge deńgeiinde qalyptasty.
