Konkýrsqa qatysýshylardyń jetistikteri ár túrli krıterııler boıynsha baǵalanǵan. Aıtalyq, elektrondyq oqý resýrstaryn ázirleý jáne jarıalaý, jazba kórýge bolatyn platformalarda usynylǵan sabaqtardyń sapasy, otandyq jáne halyqaralyq reıtıńtik basylymdardaǵy ǵylymı jarıalanymdar, ónertabysqa patentterdiń bolýy, qorǵaý rásiminen sátti ótken doktoranttardyń jumystaryna basshylyq etý.
Respýblıkalyq konkýrstyq komısıa mamandyq boıynsha úzdikterdiń ishinen úzdikterdi tańdady. Nátıjesinde 150 oqytýshy jeńimpaz atandy. Olardyń árqaısysy 2000 AEK kóleminde syıaqy alady, bul shamamen 6 mln teńgeni quraıdy. Aqshalaı yntalandyrýdan basqa, «JOO úzdik oqytýshysy» konkýrsynyń jeńimpazdary tósbelgige ıe bolady.
Abaı ýnıversıtetinen konkýrsqa 19 oqytýshy qatysty, olardyń arasynda tájirıbesi 15 jyldan kem bar jas ǵalymdar da bar.
Ýnıversıtetimizdiń 7 oqytýshysy «JOO úzdik oqytýshysy – 2021» konkýrsynyń jeńimpazdary boldy. Biz úshin bul óte joǵary kórsetkish. Bizdiń ýnıversıtette eń úzdikter jumys isteıtinin maqtan tutamyz! «JOO úzdik oqytýshysy – 2021» konkýrsynyń barlyq jeńimpazdaryn quttyqtap, joǵary jetistikteri men ýnıversıtetimizdiń reıtıńine qosqan úlesi úshin alǵys aıtamyz!
Abaı atyndaǵy Qazaq ulttyq pedagogıkalyq ýnıversıtetiniń «JOO úzdik oqytýshysy-2021» ataǵynyń ıegerleri: f.ǵ.d., profesor Shaıbakova Damına Dısıngaleevna; p.ǵ.d., profesor Saǵymbaeva Aınur Esenǵazyqyzy; p.ǵ.d., profesor Kósherbaeva Aıgerim Nuralıqyzy; fız. - mat.ǵ.k., qaýym.profesor Yskakova Narkesh Bilálqyzy; p.ǵ.k., qaýym.profesor Koneva Svetlana Nıkolaevna; z.ǵ.k., qaýym.profesor Kalkaeva Nesibelı Baqytqyzy; PhD, postdoktorant Sabırova Dına Altaevna.
