Osylaisha ekonomikalyq saiasattyń jańa modeline kóshýdiń naqty jáne tiimdi tetikteri aiqyndaldy. Olar ádildik, inkliýzivtilik, tiimdilik jáne pragmatizm qaǵidalaryna taban tireidi. Usynylǵan sharalar ekonomikadaǵy qurylymdyq ózgeristerge jáne azamattardyń ómir súrý sapasyn jaqsartýǵa arnalǵan.
Ulttyq biznestiń múddesin qorǵaý, shaǵyn jáne orta kásipkerlikti qoldaý da Prezidentimizdiń erekshe nazarynda. Sondai-aq Joldaýda investitsiia tartý boiynsha naqty sharalar kórsetildi. Osy rette óńdeý ónerkásibine serpin berý úshin sheteldik jáne otandyq investorlar alǵashqy úsh jylda salyqtan bosatylatynyn basa aitý kerek.
Reformalardyń mańyzdy baǵyttarynyń biri - salyq jáne biýdjet zańnamasyn odan ári jetildirý. Bul rette Parlament Úkimetpen birlesip, eldegi kásipkerlik jáne investitsiialyq ahýaldy jaqsartý jónindegi tetikterdi pysyqtaidy.
Sonymen qatar Memleket basshysy sý resýrstaryn utymdy paidalaný máselesine erekshe kóńil bóldi. Osy salada qordalanǵan problemalardy júieli sheshý úshin jeke ministrlik quryldy. Mundai qadam elimizdegi sý qaýipsizdigi máselelerin maqsatty túrde sheshýge jáne salany josparly damytýǵa múmkindik beredi.
Prezidentimiz kólik-logistika salasyn da odan ári damytý jóninde naqty tapsyrmalar berdi. Jańa bastamalar elimizdiń qýatty logistikalyq áleýetin tiimdi iske asyrýǵa jol ashatyny anyq. Jańadan qurylǵan Kólik ministrligi osy baǵyt boiynsha keshendi jumystar júrgizedi.
Joldaýda negizgi naryqtardy demonopolizatsiialaý, memlekettiń ekonomikaǵa yqpalyn azaitý boiynsha qajetti sharalar qabyldaý kerektigi de aityldy. Bul bastamalar elimizdegi kásipkerliktiń jandanýyna oń áserin tigizedi.
Odan bólek, Úkimet pen Parlament bank júiesiniń tiimdiligin jáne onyń el ekonomikasyna qosatyn úlesin arttyrýǵa kómektesetin zańnamalyq túzetýlerdi qaraýy qajet. Osy baǵyttaǵy normalar ulttyq tabysty barynsha ádil bólýge yqpal etedi.
Demografiialyq úderisterdi eskere otyryp, búgin Memleket basshysy «Keleshek» atty jańa baǵdarlama ázirleý týraly bastama kóterdi. Bul – balalardyń bilim alýy úshin bastapqy kapitaldy jinaqtaýǵa kómegin tigizetin mańyzdy qadam.
Sondai-aq Prezidentimiz Joldaýda óńirlerdiń biýdjet salasyndaǵy derbestigin arttyrýǵa arnalǵan naqty tapsyrmalar berdi. Soǵan sáikes salyq tólemderiniń bir bóligin aimaqtarǵa berý kózdelip otyr. Budan bylai aýdandyq ákimdikter biýdjetti ózderi jasaqtai alady. Bul, óz kezeginde, jergilikti jerdegi memlekettik basqarýdyń tiimdiligin arttyrady.
Osy rette ákimshilik reformanyń jalǵasatynyn atap ótý qajet. Soǵan sáikes Úkimet músheleri men ákimderdiń jaýapkershiligi artady. Memlekettik josparlaý barynsha jinaqy jáne ikemdi bola túsedi.
Memleket basshysynyń osy jáne ózge de bastamalary, eń birinshi kezekte, azamattarymyzdyń ál-aýqatyn arttyrýǵa jáne ekonomikamyzdy ártaraptandyrýǵa baǵyttalǵan. Qazirgi tańda álemdegi ahýal óte kúrdeli. Atalǵan bastamalardy iske asyrý osy sheshýshi kezeńde elimizdiń teńgerimdi jáne sapaly damýyna tyń serpin beredi.
Osy oraida erekshe nazar aýdaratyn jait, aitylǵan tapsyrmalardyń basym bóligi úsh jyldyń ishinde júzege asýǵa tiis.
Ekonomikalyq damýdyń jańa tásilderin iske asyrý úshin berik quqyqtyq baza qajet. Sondyqtan Prezidentimizdiń barlyq reformasyn zańnamalyq turǵydan qamtamasyz etý asa mańyzdy. Bul rette Parlament Senaty Májilistegi, Úkimettegi áriptesterimen, sarapshylarmen jáne múddeli taraptarmen árdaiym belsendi jumys isteidi.
Qoryta kelgende, ekonomikalyq saiasattyń jańa úlgisin júzege asyrý elimizdiń turaqty, sapaly ári uzaq merzimdi ekonomikalyq damýyna negiz bolady. Bul bastamalardyń barlyǵy Ádiletti Qazaqstan qurý isine somdy úles qosatyny sózsiz.
Máýlen ÁShIMBAEV, Qazaqstan Parlamenti Senatynyń Tóraǵasy
