Sybailas jemqorlyqqa qarsy is-qimyl agenttigi tóraǵasynyń birinshi orynbasary Ulan Sarqulov elimizdegi jolaýshylar poiyzdarynyń jaǵdaiy kóńil kónshitpeitinin málimdedi, dep habarlaidy Dalanews.kz.
Onyń aitýynsha, Qazaqstanda qazirgi tańda 14 tasymaldaýshy jumys isteidi. Onyń ishinde "Jolaýshylar tasymaly" AQ (QTJ quramynda) jáne 13 jekemenshik kompaniia bar. Alaida jolaýshylar tarapynan poiyzdardyń sanitarlyq jaǵdaiyna, qyzmet kórsetý sapasyna kóptegen shaǵymdar túsýde.
"Poiyzdardyń sanitarlyq jaǵdaiy nashar, qyzmet kórsetý sapasy tómen, jolaýshylardan kóp shaǵym túsedi. Jolaýshylarǵa taraqandarmen birge jol júrýge týra keledi. Bul máseleni buqaralyq aqparat quraldary birneshe ret kóterdi. Biz bul máseleni byltyrdan beri Kólik ministrligine birneshe ret kóterdik, biraq sheshimin tapqan joq", – dedi ol.
Agenttik ókili ásirese "Mańǵyshlaq – Oral" jáne "Qostanai – Astana" baǵyttaryndaǵy poiyzdarǵa erekshe nazar aýdardy.
"Bul baǵyttarǵa jekemenshik tasymaldaýshylar qyzmet kórsetedi jáne memleketten sýbsidiia alady. Eger qarjylai qoldaý kórsetilse, onda poiyzdardyń sapasy da soǵan sai bolýy tiis. Eń bolmaǵanda qarapaiym sanitarlyq talaptar saqtalýy kerek. Biz bul máseleni Úkimet deńgeiinde kóterdik. Oǵan kólik prokýratýrasy organdary da aralasady dep úmittenemiz. Jolaýshylar tasymalynyń sapasyn jaqsartý – basty mindet", – dedi Ulan Sarqulov.
