Qazaqstandyq kóripkel Baqyt Jumatova onyń kómegine Joǵarǵy sottaǵylar da, prokýratýradaǵylar da júginetinin aıtty, - dep habarlaıdy Dalanews.kz.
«Joǵarǵy sotta, prokýratýrada jumys isteıtin klıentterim bar. Kóptegen jýrnalıser maǵan júginedi. Áıelder ǵana kóripkelge júginedi dep aıta almaımyn. Er azamattar da, jas balalar da keledi. Er adamdar áıeli kózine shóp salyp júr me degen suraqpen keledi. Ondaı adamdar buryn bolǵan, qazir de bar, bolashaqta da bolady. Bıshimbaevtyń sotynda bári kóripkel, tarolog degen nárse baryn birinshi ret estigendeı boldy», - deıdi Baqyt Jumatova Airan medıaǵa bergen suhbatynda.
Aq ana atty qaskeleńdik emdeýshi kezinde Bolat Nazarbaev ta kelgenin aıtady.
«Men Nazarbaevtar áýletin emdegen kezim boldy. Biz otyrǵan ǵımaratty salǵan Bolat Nazarbaev dep aıtady. Shyn máninde ol salǵan joq. Biraq ǵımaratty salýǵa ózimniń shákirtterim, qarapaıym adamdar kómektesti», - deıdi Aq ana.
Ekonomıs, qoǵam qaıratkeri Aıdar Álibaevtyń sózinshe, joǵary shendi memlekettik qyzmetkerler arasynda kóripkelge barý – qalypty nárse.
«Olar árıne ony moıyndamaıdy, tynysh baryp keledi. Biraq kóbi kóripkelge júginedi. Bizdiń sheneýnikter únemi ózine senimsiz júredi. Biraq ol da qalypty jaǵdaı. Sebebi, olardy jıi aýystyryp tastaıdy. (...) Mınıstrler, ákimderdiń bári kóripkelge júginedi. Olardy qorǵap júretin, kóz tıýden qorǵaıtyn jeke kóripkelderi bolady. Keıbir kóripkelder bolashaǵy jarqyn ekenin aıtyp, kóńil kúıin kóteredi. Naqty kesip aıta almaımyn, biraq Nazarbaev ta kóripkelge barǵan. Jalpy kóripkeldiń kómegine júginý Nazarbaevtyń kezinde sánge aınalǵan degen sózder bar. Biraq onsyz da ondaı adamdar bolar edi. Bárimiz bolashaqta ne bolatynyn bilgimiz kelip otyrady ǵoı», - deıdi Aıdar Álibaev.
Eske salaıyq, burynǵy ulttyq ekonomıka mınıstri Qýandyq Bıshimbaevqa qatysty sot otyrysynda shymkenttik kóripkel kýálik etken bolatyn.
Prokýror Aıjan Aımaǵanova kóripkel jeke derekterin jarıa etkisi kelmeıtinin aıtyp, sot otyrysy barysynda sýdıadan onyń tek daýysy estilýine jaǵdaı jasalýyn surady. Kóripkel ózine qysym jasalyp jatqanyn málimdegen.
Sot otyrysy barysynda kóripkel Bıshimbaevty 1,5-2 jyldan beri anasy arqyly biletinin aıtty.
"Eki aıda bir ret qońyraý shalyp, jumysy, kásibi týraly suraıtyn. Men tarologpyn, ol birdeńe bilgisi kelse, "qarap kórińizshi" dep júginetin", - dedi ol.
Sonymen qatar, kóripkel marqum Saltanat Núkenova qaıtys bolǵan kún týraly baıandap berdi.
"Ol habarlasty. Naqty ýaqyty esimde joq. Meniń qolym bos emes edi. Biraq tutqany kóterdim. Ol "Saltanat ekeýmiz qatty mas bolyp, tóbelestik" dedi. Bul shamamen tústen keıingi ýaqyt edi. 15.00-16.00 edi. Onyń ishimdik ishkeni baıqalyp turdy. Qatty mán bermedim. Ol "qarap berińizshi" dedi. Men "dárigerge habarlas, jedel járdem shaqyr" dedim. Ol "qaıta-qaıta qarap kórińizshi" dedi. Óte qysqa áńgime boldy. 30 sekýndtaı. ..."Keshe qatty iship, qatty tóbelestik" dedi. "Men ne isteıin?" dedim. Daýysy kúndegideı emes edi, ár sózin tańdap aıtty. Men "jedel járdemge habarlas" dedim", - deıdi kýáger.
Kóripkeldiń sózinshe, Bıshimbaev Saltanattyń uıyqtap jatqanyn, qoryldap jatqanyn aıtqan. Sondaı-aq, qozǵalmaıtynyn, turmaıtynyn, eshteńe iship-jemegenin jetkizgen.
