Saran qalasyna jańa ákim taǵaiyndaldy, - dep habarlaidy Dalanews.kz.
QR Prezidenti Ákimshiliginiń jáne qalalyq máslihat depýtattarynyń kelisimi boiynsha Saran qalasynyń ákimi bolyp buryn Qaraǵandy oblysynyń ónerkásip jáne indýstriialyq-innovatsiialyq damý basqarmasynyń basshysy qyzmetin atqarǵan Daryn Bulqaiyr taǵaiyndaldy.
Jańa qala basshysyn qalalyq máslihattyń kezekten tys sessiiasynda oblys ákimi Ermaǵanbet Bólekpaev tanystyrdy. Depýtattar kandidatýrany maquldady.
Saran basshysyna qalany damytýdyń basym mindetteri belgilendi.
– Daryn Beibituly qala ákimi laýazymynda oǵan deiin bastalǵan jobalardy jalǵastyryp, aiaqtaitynyna jáne jańalaryn iske asyratynyna senimdimin, bul jergilikti turǵyndardyń ómir súrý sapasyna jáne jalpy qalanyń odan ári áleýmettik-ekonomikalyq damýyna oń áser etedi, – dedi Qaraǵandy oblysynyń ákimi Ermaǵanbet Bólekpaev
Jańa ákimniń eńbek joly qandai?
Daryn Bulqaiyr 2012 jyldan bastap memlekettik qyzmette. Qaraǵandy qalasy ákiminiń apparatynda memlekettik-quqyqtyq bóliminiń bas mamany bolyp jumys istedi.
2013 jyldan 2015 jylǵa deiin "Qaraǵandy qalasynyń turǵyn úi qatynastary bólimi" MM bas mamany, basshysynyń orynbasary boldy.
Sodan keiin Qaraǵandy oblysynyń energetika jáne turǵyn úi-kommýnaldyq sharýashylyq basqarmasynda – bas maman-zańger, biýdjetti atqarý bóliminiń bas mamany, memlekettik satyp alý jáne quqyqtyq jumys bóliminiń basshysy bolyp jumys istedi.
2017 jyldan 2021 jylǵa deiin Qaraǵandy qalasy Oktiabr aýdany ákiminiń orynbasary qyzmetin atqardy.
2021 jyldan 2023 jyldyń shildesine deiin Qaraǵandy oblysynyń jer qatynastary basqarmasyn basqardy.
2023 jyldyń shildesinen bastap osy taúaiyndaýǵa deiin Qaraǵandy oblysynyń ónerkásip jáne indýstriialyq-innovatsiialyq damý basqarmasyn basqardy.
Sarandaǵy jylý máselesi
Eske salaiyq, premer Oljas Bektenov qazannyń ortasynda Sarandaǵy páterlerdiń jylytý maýsymyna daiyn emestigine kóńili tolmai, bul jaǵdai úshin jaýapty tulǵalardy jaýapkershilikke tartýǵa pármen bergen edi.
Bul onyń jergilikti atqarýshy bilikke baǵyttalǵan eleýli jáne qatqyl eskertýi edi. Bektenovtiń aitýynsha, bul másele qala ákimi men oblys basshylyǵynyń baqylaýynyń nasharlyǵynan týyndaǵan.
Jylytý maýsymyna daiyndyq týraly jalǵan málimet bergen árbir jaýapty adam tekserilip, zań júzinde jaýapkershilikke tartylatyny aldyn ala aitylǵan bolatyn. Dál osy jaǵdai jergilikti ákimder úshin jeke jaýapkershiliktiń qajettiligin aiqyndap otyr.
Keiin, 28 qazanda, Saran ákimine qatań eskertý jariialanǵan kezde, kópshilik Baýlyqovtyń tek sógispen qutylady dep paiymdaǵan edi.
Alaida, Úkimet basshysyna bul jaza jetkiliksiz bolyp kórindi.
Osylaisha 30 qazanda Saran ákimi Erkin Baýlyqov jylý berý maýsymynyń bastalýynda jibergen olqylyqtary úshin qyzmetinen bosatylǵan edi. Qazan aiynyń ortasynda qurylysy 10 jylǵa sozylyp, biyl salynyp bitken jańa ortalyq qazandyqtaǵy aqaýlarǵa bailanysty Sarandaǵy 168 úi jylýsyz qalǵan bolatyn.
"Qaraǵandy oblysy ákiminiń ókimimen Saran qalasynyń ákimi Erkin Baýlyqov qalada jylý berý maýsymynyń bastalýynda olqylyq jibergeni úshin atqaratyn qyzmetinen bosatyldy", - dep habarlady Qaraǵandy oblysynyń ákimdigi.
Ol bul qyzmetti bir jyldan astam ǵana ýaqyt atqardy.
Endi qala basshysy mindetin ýaqytsha osyǵan deiin Saran ákiminiń orynbasary bolǵan Maqsat Qaireshov atqaratyn boldy.
Saran turǵyndarynyń jylýsyz qalýyna qatysty Premer-ministrdiń birinshi orynbasary Roman Skliar da pikir bildirgen edi. Onyń sózinshe, Saran qalasynyń ákimdigi jańa qazandyqty iske qosý kezinde apat bolǵan jaǵdaida rezervtik qýattardy qarastyrmaǵan.
"Ákimdiktiń kinási olardyń qosalqy qazandyqty ázirlemegeninde. Respýblikalyq biýdjetten 9 mlrd teńge bólingen, jańa qazandyqty tamyz aiynda synap kórip, ol jumys istep ketedi dep senip qalǵan. Alaida rezervti saqtap otyrý kerek edi. Árine, mundaiǵa jol berýge bolmaidy", - dedi Skliar.
