Sarandaǵy barlyq úiler men áleýmettik nysandar jylýǵa qosyldy. Jylý kózderi qajetti otynmen qamtamasyz etilgen. Qalanyń barlyq óndiristik nysandary óndiristik baǵdarlamalarǵa sáikes jumys isteidi. 2024 jyly 17 qazanda Energetika ministrligi osyndai málimdeme jasady, dep habarlaidy Dalanews.kz.
Energetika ministri Almasadam Sátqaliev qazandyqtardyń, ortalyq jylý kóziniń, sondai-aq jylý jelileri men áleýmettik nysandardyń jaǵdaiyn tekserip, jedel shtab otyrystaryn ótkizdi.
"Qazir rezervte turǵan barlyq jergilikti qazandyqtar daiyndalyp, iske qosyldy. Jylýdy tolyq kólemde berilýde. Biz barlyq qazandyqtarda jylý berý temperatýrasyn baqylaýdamyz. Qosymsha qazandyqtarmen keńeitý qajet bolǵan jerler de jaqyn arada keńeitiletin bolady. Turǵyndar buryn bolǵan eki qazandyq boiynsha suraq qoidy, bul úiler basqa jumys istep turǵan qazandyqtarǵa qaita qosyldy", – dedi Qaraǵandy oblysynyń ákimi Ermaǵanbet Bólekpaev.
Arnaiy komissiia qurylyp, onyń quramynda energiia qadaǵalaý ókilderi, óńirlik jáne basqa da vedomstvolardyń basshylary, Qaraǵandy oblysynyń TJD birlesip jumys jasaýda. Ortalyq jylý kózin jóndeý kezinde jabdyqtardy jetkizýshi zaýyttyń mamandary shaqyryldy.
"Biz barlyq jylý kózderin aralap, jylýmen qamtý shemasyn qalpyna keltirý jumystarynyń barysyna jetkilikti túrde egjei-tegjeili taldaý jasadyq. Kelesi sheshim qabyldandy: ortalyq jylý kózi iske qosylǵanǵa deiin qalany jylýmen qamtýdy jergilikti qazandyqtar qamtamasyz etedi. Barlyq áleýmettik nysandar jylýmen qamtamasyz etilgen, barlyq óndiristik nysandar óndiristik baǵdarlamalarǵa sáikes jumys isteýde", — dedi Almasadam Sátqaliev.
Úilerge jylý berý aiaqtalýda. Jaǵdai energetika ministrligi men oblys ákimdiginiń baqylaýynda ekeni naqtylanady.
Aita ketsek, Saran qalasyndaǵy qazandyq 2024 jyldyń 13 qazanynda iske qosyldy. Aqaýǵa bailanysty qazandyqtyń jumysy aiaq-astynan kilt toqtatyldy. 15 qazanda Premer-ministr Oljas Bektenov Sarandaǵy jylytý maýsymyndaǵy jaǵdai Úkimettiń baqylaýynda ekenin aitqan bolatyn.
