Jalpy biyl «Eńbek» baǵdarlamasy boiynsha Túrkistan oblysyna 6039 kvota bólingen. Jyl sońyna deiin bul kvotalar óz ielerin taýyp, qonys aýdarýshylar sany artady degen senim bar.
Túrkistandyqtardyń basym bóligi Pavlodar oblysyn tańdaǵan. Bul óńirge 205 otbasy (972 adam) nemese kóshýshilerdiń 67,9 paiyzy qazyq qaqqan. Soltústik Qazaqstan oblysyna 69 otbasy (272 adam), Qostanai oblysyna 16 otbasy (74 adam), al, Shyǵys Qazaqstan oblysyna 12 otbasy (23 adam) kóshken.
Jalpy respýblikada kóleminde qonys aýdarýshylar sany boiynsha Túrkistan oblysynyń úlesi 30 paiyzdy qurap otyr. Soltústikke qonys aýdarý boiynsha Sairam (150 adam), Saryaǵash (142 adam), Jetisai (118 adam), Maqtaaral (115 adam), Shardara (104 adam) men Arys (108 adam) qalasy kósh bastap tur.
Búginde «Eńbek» baǵdarlamasy boiynsha kóshi-qondy jandandyrý baǵytynda jumys jandana túsken. Bul strategiialyq mańyzy bar jumys Túrkistan oblysy ákimdiginiń, «Nur Otan» partiiasynyń Túrkistan oblystyq filialy men Túrkistan oblystyq jumyspen qamtýdy úilestirý jáne áleýmettik baǵdarlamalar basqarmasynyń jumys josparyna engizilgen.
Qonys aýdarýshylardy jumysqa ornalastyrý jáne kásipkerlikti damytýyna járdemdesý, qysqa merzimdi kásiptik kýrstarǵa jiberý kózdelgen. «Eńbek» memlekettik baǵdarlamasy sheńberinde qonys aýdarǵan árbir qatysýshyǵa jáne olardyń otbasy múshelerine 70 AEK mólsherinde (204190 teńge) materialdyq kómek beriledi.
Sondai-aq qonys aýdarýshyǵa on eki ai boiy ai saiyn turǵyn úidi jaldaý (jalǵa alý) jáne kommýnaldyq qyzmetterge aqy tóleý boiynsha materialdyq kómek qaralǵan.
Mysaly qalalyq jerlerge qonys aýdarǵan bir adamǵa 20 AEK (58340 teńge) mólsherinde qarjy beriledi. Eger otbasy músheleriniń sany ekeýden tórteýge deiin bolsa, 25 AEK (72925 teńge) mólsherinde tólenedi.
Al aýyldyq aýmaqtarǵa qonys aýdarǵan bir adam úshin 15 AEK (43755 teńge) mólsherinde tólenedi. Eger otbasy músheleriniń sany ekeýden tórteýge deiin bolǵan kezde 18 AEK (52506 teńge) mólsherinde qarjylai kómek kórsetiledi.
«Nur Otan» partiiasynyń Túrkistan oblystyq filialy tóraǵasynyń birinshi orynbasary Beisen Tájibaevtyń aitýynsha, «Eńbek» baǵdarlamasynyń mańyzy óte zor.
– Biz oblystyq jumyspen qamtýdy úilestirý jáne áleýmettik baǵdarlamalar basqarmasymen jáne belsendi azamattarmen, depýtattarmen birlesip, kóshi-qon baǵdarlamasynyń nasihatyn kúsheittik. Uiymdastyrý, aqparattyq is-sharalaryn júieledik. Bul baǵytta jumys jalǵasa beredi. Eńbek kúshi az óńirlerge qonys aýdarý arqyly otbasylar jańa múmkindikterge ie bolady ári táýelsizdikti nyǵaitýǵa úles qosady, – deidi Beisen Tájibaev.
Jalpy «Eńbek» baǵdarlamasy qolǵa alynǵan 2016-2021 jyldar aralyǵynda Túrkistan oblysynan Soltústik óńirlerge 2024 otbasy quramynda 7381 adam qonys aýdardy. Olarǵa tiisti járdemaqylary berilip, jumyspen, baspanamen qamtý boiynsha jumystar jalǵasyp jatyr.
