جالپى بيىل «ەڭبەك» باعدارلاماسى بويىنشا تۇركىستان وبلىسىنا 6039 كۆوتا بولىنگەن. جىل سوڭىنا دەيىن بۇل كۆوتالار ءوز يەلەرىن تاۋىپ، قونىس اۋدارۋشىلار سانى ارتادى دەگەن سەنىم بار.
تۇركىستاندىقتاردىڭ باسىم بولىگى پاۆلودار وبلىسىن تاڭداعان. بۇل وڭىرگە 205 وتباسى (972 ادام) نەمەسە كوشۋشىلەردىڭ 67،9 پايىزى قازىق قاققان. سولتۇستىك قازاقستان وبلىسىنا 69 وتباسى (272 ادام)، قوستاناي وبلىسىنا 16 وتباسى (74 ادام)، ال، شىعىس قازاقستان وبلىسىنا 12 وتباسى (23 ادام) كوشكەن.
جالپى رەسپۋبليكادا كولەمىندە قونىس اۋدارۋشىلار سانى بويىنشا تۇركىستان وبلىسىنىڭ ۇلەسى 30 پايىزدى قۇراپ وتىر. سولتۇستىككە قونىس اۋدارۋ بويىنشا سايرام (150 ادام)، سارىاعاش (142 ادام)، جەتىساي (118 ادام)، ماقتاارال (115 ادام)، شاردارا (104 ادام) مەن ارىس (108 ادام) قالاسى كوش باستاپ تۇر.
بۇگىندە «ەڭبەك» باعدارلاماسى بويىنشا كوشى-قوندى جانداندىرۋ باعىتىندا جۇمىس جاندانا تۇسكەن. بۇل ستراتەگيالىق ماڭىزى بار جۇمىس تۇركىستان وبلىسى اكىمدىگىنىڭ، «Nur Otan» پارتياسىنىڭ تۇركىستان وبلىستىق فيليالى مەن تۇركىستان وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ جۇمىس جوسپارىنا ەنگىزىلگەن.
ءاربىر اۋدان مەن قالادا كوشى-قونعا جاۋاپتى مامان بەكىتىلىپ، جۇمىسپەن قامتۋ ورتالىقتارىندا ازاماتتارعا ءتيىستى اقپارات پەن كومەك بەرىلىپ جاتىر. كوشۋگە نيەت بىلدىرگەن ازاماتتار جۇمىسپەن قامتۋ ورتالىقتارىنان مالىمەت الا الادى.
قونىس اۋدارۋشىلاردى جۇمىسقا ورنالاستىرۋ جانە كاسىپكەرلىكتى دامىتۋىنا جاردەمدەسۋ، قىسقا مەرزىمدى كاسىپتىك كۋرستارعا جىبەرۋ كوزدەلگەن. «ەڭبەك» مەملەكەتتىك باعدارلاماسى شەڭبەرىندە قونىس اۋدارعان ءاربىر قاتىسۋشىعا جانە ولاردىڭ وتباسى مۇشەلەرىنە 70 اەك مولشەرىندە (204190 تەڭگە) ماتەريالدىق كومەك بەرىلەدى.
سونداي-اق قونىس اۋدارۋشىعا ون ەكى اي بويى اي سايىن تۇرعىن ءۇيدى جالداۋ (جالعا الۋ) جانە كوممۋنالدىق قىزمەتتەرگە اقى تولەۋ بويىنشا ماتەريالدىق كومەك قارالعان.
مىسالى قالالىق جەرلەرگە قونىس اۋدارعان ءبىر ادامعا 20 اەك (58340 تەڭگە) مولشەرىندە قارجى بەرىلەدى. ەگەر وتباسى مۇشەلەرىنىڭ سانى ەكەۋدەن تورتەۋگە دەيىن بولسا، 25 اەك (72925 تەڭگە) مولشەرىندە تولەنەدى.
ال اۋىلدىق اۋماقتارعا قونىس اۋدارعان ءبىر ادام ءۇشىن 15 اەك (43755 تەڭگە) مولشەرىندە تولەنەدى. ەگەر وتباسى مۇشەلەرىنىڭ سانى ەكەۋدەن تورتەۋگە دەيىن بولعان كەزدە 18 اەك (52506 تەڭگە) مولشەرىندە قارجىلاي كومەك كورسەتىلەدى.
«Nur Otan» پارتياسىنىڭ تۇركىستان وبلىستىق فيليالى ءتوراعاسىنىڭ ءبىرىنشى ورىنباسارى بەيسەن تاجىبايەۆتىڭ ايتۋىنشا، «ەڭبەك» باعدارلاماسىنىڭ ماڭىزى وتە زور.
– ءبىز وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىمەن جانە بەلسەندى ازاماتتارمەن، دەپۋتاتتارمەن بىرلەسىپ، كوشى-قون باعدارلاماسىنىڭ ناسيحاتىن كۇشەيتتىك. ۇيىمداستىرۋ، اقپاراتتىق ءىس-شارالارىن جۇيەلەدىك. بۇل باعىتتا جۇمىس جالعاسا بەرەدى. ەڭبەك كۇشى از وڭىرلەرگە قونىس اۋدارۋ ارقىلى وتباسىلار جاڭا مۇمكىندىكتەرگە يە بولادى ءارى تاۋەلسىزدىكتى نىعايتۋعا ۇلەس قوسادى، – دەيدى بەيسەن تاجىبايەۆ.
جالپى «ەڭبەك» باعدارلاماسى قولعا الىنعان 2016-2021 جىلدار ارالىعىندا تۇركىستان وبلىسىنان سولتۇستىك وڭىرلەرگە 2024 وتباسى قۇرامىندا 7381 ادام قونىس اۋداردى. ولارعا ءتيىستى جاردەماقىلارى بەرىلىپ، جۇمىسپەن، باسپانامەن قامتۋ بويىنشا جۇمىستار جالعاسىپ جاتىر.
