Premer-ministr Oljas Bektenov el ekonomikasyn damytý máselesi jóninde jumys keńesin ótkizdi. Ónerkásiptiń ósýin qamtamasyz etý sharalaryna nazar aýdaryldy, dep habarlaidy Dalanews.kz Úkimettiń baspasóz qyzmetine silteme jasap.
Ónerkásip jáne qurylys ministri Ersaiyn Naǵaspaev Memleket basshysynyń óndiris kólemin ulǵaitý men ósý úrdisin bekitý boiynsha tapsyrmalaryn oryndaý aiasynda atqarylyp jatqan jumystar týraly baiandady.
Biylǵy qańtar-naýryz ailarynda óńdeý ónerkásibinde turaqty oń serpin 8,7% deńgeiinde saqtalyp otyr. Negizgi ósim mashina jasaý (17,7%), tamaq óndirisi (13,2%), mashinalar men jabdyqtardy qospaǵanda, daiyn metall buiymdary (28,7%) salalaryndaǵy kórsetkishterdiń ósýi arqasynda qamtamasyz etilgen. Sonymen qatar taý-ken ónerkásibinde ósim (6,1%) baiqaldy.
Qurylys salasynda toqsandyq qorytyndy negizinde ósý kórsetkishi 16,9%-ǵa jetti. Mektepter, avtokólik joldary, temirjol jelileri, injenerlik infraqurylym qurylysy boiynsha jumys kóleminiń artýy týraly baiandaldy.
Premer-ministr otandyq óndiristermen, onyń ishinde Energetikalyq jáne kommýnaldyq sektorlardy jańǵyrtý jónindegi ulttyq jobany júzege asyrý sheńberinde ózara is-qimyldy arttyrý boiynsha birqatar tapsyrma berdi.
QR Strategiialyq josparlaý jáne reformalar agenttigi Ulttyq statistika biýrosynyń aldyn ala derekteri boiynsha, biylǵy qańtar-naýryz ailarynda JIÓ ótken jyldyń sáikes kezeńimen salystyrǵanda 5,8%-dy qurady. Naqty kólem indeksi kólik salasynda – 21%-dy, qurylysta – 16,9%-dy, ónerkásipte – 6,6%-dy, saýdada – 6,3%-dy quraidy.
