Búgin Jetisý oblysynda «Áz Naýryz – igilikter bastaýy!» ataýymen Naýryz merekesi ótkizilýde. Osy kúni Taldyqorǵandaǵy «Jastar» saiabaǵy mańynda etno-aýyl tigilip, onda salt-dástúr kórseteldi, sporttyq jarystar, qolóner kórmeleri, ulttyq buiymdar jármeńkesi siiaqty kóptegen is-sharalar uiymdastyryldy, - dep habarlaidy Jetisý oblysy ákiminiń baspasóz qyzmeti.
Taldyqorǵandaǵy Qonaev kóshesiniń boiynda sap túzegen «Naýryz aýylyndaǵy» kiiz úilerde qazaq halqynyń salt-dástúrlerinen kórinister kórsetilip, «Jastar» sport kesheniniń aýmaǵynda palýandar arasynda qazaq kúresinen «Taldyqorǵan barysy» jarysy uiymdastyryldy.
Sol siiaqty oblystaǵy etno-mádeni ortalyqtardyń kórmesi, ulttyq taǵamdary men merekelik án-kúii usynyldy jáne ulttyq sport oiyndarynan jarystar uiymdastyryldy. Oǵan qalalyqtar men qala qonaqtary, jalpy meiramǵa kelýshiler belsene qatysty.
Sahnadaǵy mereke oblys ákimi Beibit Isabaevtyń quttyqtaýymen bastaldy. Oblys ákimi óz sózinde sońǵy jyldary Naýryzdy halyqty biriktiretin, qoǵamdy uiystyratyn ortaq qundylyq retinde ornyqtyrýǵa basa nazar aýdarylyp otyrǵanyn atap ótti.
- Ulystyń Uly kúnin atap ótýdi ózderińizben birge 14 naýryz – Kórisý kúni - Amal merekesimen bastadyq. Jarqyn bolashaqqa nyq qadam bassyn degen nietpen bir kúnde 50 sábidiń tusaýyn kestik, bul igi is Qazaqstannyń rekordtar kitabyna engizildi. «Qaiyrymdylyq jasasań, qaiyryn kóresiń», - deidi halqymyz. Óńirde demeýshilerdiń kómegimen, volonter jastardyń atsalysýymen júzdegen muqtaj otbasylarǵa qaiyrymdylyq kórsetilip, qarttarǵa qolǵabys jasaldy.
Árine, qaiyrymdylyq bir kúnmen shektelmeidi. Iri metsenattar oblystyń ár túkpirinde jyl boiy turǵyn úi qurylysy, densaýlyq saqtaý, sport jáne taǵy basqa mańyzdy salalarda jeke investitsiia salyp, halyqqa qyzmet etetin mańyzdy nysandar turǵyzdy. Biyl da birqatar jobalar jalǵaspaq, - degen Beibit Isabaev Naýryznamada ataý qoiylǵan ár kúnniń mán-mańyzy jaily aitty.
Sol siiaqty Prezidenttiń jýyrda Atyraý qalasynda ótken Ulttyq quryltaidyń III jiynynda elimizdi damytýǵa, halyqtyń birligin bekemdei túsýge qatysty aitqan mańyzdy bastamalaryna toqtaldy. Sóziniń sońynda halyqqa izgi tilegin bildirdi.
- Jetisý óńiriniń kórkeiip-gúldenýine kúsh-qairatyn arnap, bereke-birligimen atsalysqan barsha qaýymǵa shyn júrekten rizashylyǵymdy bildiremin. Biylǵy 2024 jańa jylda da ózderińizben birge ortaq maqsat-múdde jolynda birlesip eńbek etemiz dep senemin.
Sizderge myqty densaýlyq, tolaiym tabys, uzaq ta maǵynaly ǵumyr, baq-bereke tileimin. Ár shańyraqta jarastyq, qýanysh, molshylyq bolsyn, - dedi B. Isabaev.
Munan soń «Qasietti halyq toiy - nurly Naýryz» atty teatrlandyrylǵan qoiylym qoiylyp, onda «Tabiǵattyń oianýy», «Alastaý rásimi», «Kún men túnniń teńelý», «Salt-dástúr», «Qyzǵaldaqtar» bii, «Naýryz kóje», «Shashý» kórinisteri kópshilikke pash etildi.
Osy kúni «Jastar» Sport saraiynda mektep fýtbol komandalarynyń arasynda oiyn uiymdastyrylyp, 100 fýtbol doby taratyldy. Mereke keshkilik otshashýmen, jastardyń bi keshimen jalǵasady.
Fotosýretterdi túsirgen: Jeńis Ysqabai, Dmitrii Erofeev.
