Jetisý oblysynyń S. Seıfýllın atyndaǵy ortalyq kitaphanasyndaǵy kitap qory «Kitaphanaǵa kitap syıla» aksıasynyń aıasynda bıylǵy jyldyń úsh aıynda 4 myńǵa jýyq kitappen tolyqqan. Aksıaǵa jeke oqyrmandarmen qatar mekemeler men uıymdar da atsalysýda, – dep habarlaıdy Dalanews.kz Jetisý oblysy ákiminiń baspasóz qyzmetine silteme jasap.
Jetisý oblystyq kitaphananyń málimetine súıensek, «Kitaphanaǵa kitap syıla» oblystyq aksıasy jyl saıyn dástúrli túrde ótkizilip keledi. Halyqtyń rýhanı baılyǵyn eseleý, kitaphananyń kitap qoryn ádebıettermen tolyqtyrý, oqyrman men kitaphana arasyndaǵy baılanysty nyǵaıtý maqsatynda uıymdastyrylǵan aksıaǵa belsene qatysýshylar qarasy kóp.
– Ulttyq akademıalyq kitaphana, Ulttyq kitaphana, «Danalyq» qoǵamdyq qory, Z. Sánik atyndaǵy mádenı qor, «KIT» iskerlik ortalyǵy jáne basqa da mekeme-uıymdarǵa, jeke azamattarǵa rızashylyǵymyzdy bildiremiz. Ásirese oblystyq qoǵamdyq damý basqarmasy janyndaǵy «Til» oqytý-ádistemelik ortalyǵynyń bizge 500 dala kitap tapsyrǵanyn erekshe atap ótýge bolady, – dedi S. Seıfýllın atyndaǵy ortalyq kitaphananyń dırektory Samal Shaıahmetova.
Oǵan qosa jyl basynda ótkizilgen «Jetisý kitap kerýeni» sharasynda da jeke avtorlar birshama kitaptaryn syıǵa tartqan. Sol sıaqty kitaptar Jetisý oblysy aýmaǵymen qatar Astana, Almaty, Semeı, Óskemen qalalarynan da joldanǵan. Kitap qoryn tolyqtyrǵan baspa ónimderiniń basym bóligi kórkem ádebıet, degenmen olardyń ishinde aýyl sharýashylyǵy, ekonomıka, iskerlik, tarıh, til úıretý salalaryna arnalǵan ǵylymı-tanymdyq jáne ádistemelik kitaptar da bar.
– «Til» oqytý-ádistemelik ortalyǵy Seıfýllın kitaphanasyna 500 dana kitap tapsyrdyq. Olar – negizinen til úıretýge baılanysty ádistemelik kitaptar, fılologıa fakúltetterine oqýǵa túskisi keletin jastarǵa qajetti ádebıetter. Ortalyq Ahmet Baıtursynov atyndaǵy Til bilimi ınstıtýtymen memorandýmǵa otyrǵan. Sonyń negizinde ınstıtýttan joldanǵan kitaptardyń bir bóligin oqyrmany kóp mekeme retinde kitaphanaǵa tapsyrýdy jón kórdik, – deıdi «Til» oqytý-ádistemelik ortalyǵy» KMM dırektory Jeńis Joldybaı.
Atap ótsek, aksıa asynda 2022 jyly S. Seıfýllın atyndaǵy ortalyq kitaphanaǵa 196 dana kitap berilse, 2023 jyly syıǵa tartylǵan kitaptardyń sany 2400-ge jýyqtaǵan. Bıylǵy jyldyń úsh aıynyń ózinde kitaphana qory 3843 dana kitappen tolyǵyp otyr. Al jalpy atalmysh kitaphananyń kitap qory búgingi kúni 200 myńnan asady.
