Jetisý oblysynda Aqsý jáne Kóksý qant zaýyttary tátti túbir qabyldai bastady. Eki zaýytta barlyǵy 528 myń tonna qant qyzylshasyn qaita óńdeý josparlanǵan,- dep habarlaidy Dalanews.kz
Oblystyq aýyl sharýashylyǵy basqarmasynyń málimetinshe, biyl óńirde qant qyzylshasy shamamen 12,2 myń gektarǵa egilgen. Qazir Aqsý, Alakól, Sarqan, Eskeldi jáne Kóksý aýdandarynda ónim jinaý jumystary bastaldy. Jinaýǵa 113 kombain men 52 japyraq jinaǵysh mashina qatysýda. Kombaindardyń qýattylyǵy kúnine 700 gektarǵa deiin jinaýǵa múmkindik beredi. Búgingi tańda 240 gektar jer qazylyp, 10 myń tonnadan astam ónim jinaldy, ortasha túsim – gektaryna 422,6 tsentner.
– Aýyl sharýashylyǵy salasynda qant qyzylshasy asa mańyzdy. Bizdiń oblysta tátti túbirdi ósirý jaqsy jolǵa qoiylǵan. Jergilikti biýdjetten óndirilgen qant qyzylshasynyń tonnasyna 25 myń teńge sýbsidiia tólense, zaýyttar tonnasyna taǵy 15 myń teńge beredi. Nátijesinde satyp alý baǵasy 40 myń teńgege jetedi. Sonymen qatar qyzylsha ósirýshiler satyp alynǵan tuqymdar, mineraldy tyńaitqyshtar, pestitsidter úshin de sýbsidiia alady. Olarǵa arzandatylǵan janar-jaǵarmai, lizingke tehnika usynylady. Oblysta barlyǵy qyzylsha baǵytyndaǵy 25 servistik-daiyndaý ortalyǵy jumys isteidi. Onda 450-ge jýyq aýyl sharýashylyǵy tehnikasy bar. Búginde eki zaýyt ta astyqty qabyldap, óńdeýge daiyn. Aqsý qant zaýyty kólikterdiń turǵan kezegine sáikes kúnine 3 myń tonnaǵa deiin qabyldasa, Kóksý qant zaýyty keste boiynsha kúnine 2 myń tonna ónim alýǵa qaýqarly. Jalpy alǵanda 528 myń tonna ónim alynady dep kútilýde. Onyń 292 myń tonnasy Aqsý qant zaýytyna, 236 myń tonnasy Kóksý zaýytyna baǵyttalady, – deidi oblystyq aýyl sharýashylyǵy basqarmasynyń basshysy Nurdáýlet Kenenbaev.
Aita keteiik, Kóksý aýdanynda biyl qant qyzylshasyn ósirýmen 136 sharýashylyq ainalysýda.
– Biz biyl 40 gektar jerge qant qyzylshasyn otyrǵyzdyq. Qyzylsha jinaý naýqany bastaldy. Barlyq qajetti tehnika bar. Mine, alǵashqylardyń biri bolyp qyzylshany qabyldaý pýnktine ákeldik, bárin tez tapsyryp, astyqty shyǵynsyz jinaýdy josparlap otyrmyz. Ótken jyly biz qyzylsha tapsyrýdy 15 qyrkúiekte bastadyq jáne on kúnde aiaqtadyq. Biyl jumysty qazanda bastap otyrmyz. Endi ónimimiz jemisti bolady dep oilaimyz. Aitpaqshy, aýdanymyzdaǵy óńdeý zaýyty maiburshaqty da qabyldaidy. Sol isti de qolǵa aldyq, – dep atap ótti sharýa qojalyǵynyń basshysy Maqsat Ábdirahmanov.
Aýa raiynyń qolaisyzdyǵyna qaramastan, qant qyzylshasyn qabyldaý Aqsý qant zaýytynda da bastaldy. Jalpy aýdanda biyl qant qyzylshasyn 2400 gektarǵa 94 sharýa qojalyǵy ekti. Kórshiles Sarqan jáne Alakól aýdandarynyń sharýalary da qant zaýytyna óz ónimderin tapsyryp jatyr. Zaýytta qaita óńdeýdi iske qosý 7 qazanǵa josparlanǵan.
