Jetisý oblysynda Aqsý jáne Kóksý qant zaýyttaryna ótkizilgen taza salmaǵy 560 myń tonna qant qyzylshasyna 14 mlrd. teńge sýbsidiia tolyq kólemde tólendi,- dep habarlaidy Dalanews.kz Jetisý oblysy ákiminiń baspasóz qyzmetine silteme jasap.
Oblystyq aýyl sharýashylyǵy basqarmasynyń málimetine qaraǵanda, qant qyzylshasy boiynsha sýbsidiialaýǵa 679 ótinim túsken. Soǵan sáikes sharýalarǵa sýbsidiia tolyq kólemde tólendi. Sondai-aq Aqsý jáne Kóksý qant zaýyttary qabyldaǵan qant qyzylshasy úshin sharýa qojalyqtaryna 8,4 mlrd. teńge tóledi.
"Biz Aqsý, Kóksý zaýyttaryna qant qyzylshasyn ótkizgenbiz. Búgingi kúni eki zaýyt ta sharýashylyqtarymyzben tiesili esep aiyrysyp boldy. Qazirgi kezde basym daqyldarǵa beriletin sýbsidiiany aldyq, sonyń arqasynda kóktemgi dala jumystaryna daiyndyǵymyz qyzý júrip jatyr. Jalpy kóktemgi egiske qajetti tehnikalardy jóndeý jumystaryn osydan bir ai buryn bastaǵanbyz. Qazir egistik alqaptarǵa kerekti tuqymǵa tapsyrys berip qoidyq. Biz jyl saiyn qant qyzylshasyn kem degende 100 gektar jerge sebemiz. Biyl da qant qyzylshasyn, júgeri, maiburshaq siiaqty birqatar daqyl egýdi josparlap otyrmyz. Kóktemgi dala jumystaryna jeńildik baǵamen beriletin janar-jaǵarmai alatyn qarjymyz da daiyn", - deidi Kóksý aýdanyndaǵy «Keń dala» sharýa qojalyǵynyń basshysy Qalibek Alpysbaev.
Eske salsaq, ótken jyly Jetisý oblysynda qant qyzylshasynyń egis alqaptary 13,7 myń gektar boldy. Odan jalpy 635,0 myń tonna ónim alyndy, ortasha ónimdiligi gektaryna 465,0 tsentnerden ainaldy. Alynǵan ónimniń 5 myń tonnasy mal azyǵyna baǵyttalsa, 630 myń tonnasy zaýyttarǵa ótkizildi, onyń 560 myń tonnasy taza salmaqty qurady.
