Jetisýda zamanaýi ońaltý ortalyǵy ashyldy
– El Táýelsizdiginiń 30 jyldyǵy qarsańynda Qapshaǵai qalasynda eresekterge arnalǵan ońaltý ortalyǵyn ashyp otyrmyz. Memleket basshysy Qasym-Jomart Kemeluly Toqaev halyqqa arnaǵan Joldaýynda eldiń áleýmettik salasyn jańǵyrtý jáne azamattardyń ál-aýqatyn kóterý memlekettik saiasattyń basty maqsaty ekenin atap ótken bolatyn. Osyǵan bailanysty oblysta halyqty áleýmettik qorǵaý júiesin tiimdi damytýǵa, áleýmettik-meditsinalyq qyzmet qoljetimdiligi men sapasyn arttyrýǵa bar jaǵdai jasalyp otyr. Osy baǵyttaǵy mańyzdy mindetterdiń biri – erekshe muqtajdyǵy bar adamdarǵa qoldaý kórsetý. Búgingi kúni ońaltý quraldarymen jáne qyzmetterimen 31 myńdai adam nemese 88% qamtylǵan. Ómirdiń qiyn jaǵdailarynda qalǵan 3 myńnan astam adamǵa áleýmettik arnaiy qyzmet kórsetetin 15 memlekettik mekeme jumys isteidi. Sol siiaqty 33 «Invataksi» arnaiy avtokóligi tegin qyzmet kórsetedi, – dep atap ótti B.Baijumanov.
Ashylǵan jańa ortalyqta emdelýshilerge arnalǵan 17 bólme, ákimshilik jáne emdeý kabinetteri, sonyń ishinde massaj jasaý, tuzdy shahta, fizioemdeý, 4 LFK kabineti jáne basqalary bar. San túrli trenajerlar tirek-qimyl apparattaryn damytýǵa, insýlttan jáne infarkttan keiin aǵzany qalpyna keltirý, tynys alý júieleri organdary aýrýlarynyń aldyn alýǵa jáne olardan emdeýge baǵyttalǵan. Ortalyqta kardiolog, nevrolog, travmatolog, diabetolog, kishi meditsinalyq qyzmetker – jalpy sany 21 maman jumys isteidi. Negizinen tirek-qimyl apparaty men túrli júielerdi tolyq qalpyna keltirý, sol siiaqty kúndelikti ómir men eńbek jaǵdaiyna beiimdeý qyzmetteri kórsetiledi. Ortalyqta ońaltýdan ótip jatqan adamdarǵa 4 ýaqyt tamaq beriledi. Nysandy odan ári keńeitý josparlanǵan, iaǵni jylyna myń adamǵa deiin qabyldaityn múmkindik jasalmaq. Jobanyń jalpy quny 17 mln. teńgeden asady.
Osyndai taǵy bir nysan Qaratal aýdany Úshtóbe qalasynda «Qaratal» kúndizgi bolý ortalyǵynyń janynan 50 adamǵa arnalyp ashyldy.
Mekemeni biyl kútip ustaýǵa biýdjetten 123 mln. teńge bólindi. Ǵimaratqa aǵymdaǵy jóndeý jumystary jasaldy, aýlasy abattandyryldy, materialdyq-tehnikalyq bazasy jańartyldy. Mekeme zamanaýi ońaltý quraldarymen jabdyqtalǵan. Ortalyqta logoped, defektolog, psiholog, meditsinalyq mamandar qyzmet kórsetedi.
Oblystyq jumyspen qamtýdy úilestirý jáne áleýmettik baǵdarlamalar basqarmasynyń basshysy Marjan Murattyń aitýynsha, aýdandaǵy shalǵai aýyldardyń balalary nazardan tys qalmaidy. Kishkentailardyń analary da ortalyqta balalarynyń janynda bola alady.
– Kúndizgi bolý ortalyǵyna kelip júrgenimizge biraz boldy. Osy ýaqyt aralyǵynda balamnyń densaýlyǵynda ońalý belgileri baiqala bastady. Ortalyqty ashýǵa úles qosqan azamattardyń bárine analardyń atynan rahmet aitamyn, – dedi 6 jasar Aibektiń anasy Ásem Qoishyǵulova.
Jalpy biylǵy jyly Almaty oblysynda 9 meditsinalyq-áleýmettik mekemeniń aýlasy abattandyryldy, kógaldandyryldy, asfalt jabyny salyndy, vorkaýt alańdary ornatyldy, fýtbol alańdary salyndy. 2 meditsinalyq-áleýmettik mekeme ǵimaratyna kúrdeli jóndeý jasaldy, 8 mekemege balalardyń bulshyq et jáne immýndy júielerin nyǵaitýǵa, tirek-qimyl apparattaryn damytýǵa arnalǵan zamanaýi ońaltý qural-jabdyqtary satyp alyndy.
