– ەل تاۋەلسىزدىگىنىڭ 30 جىلدىعى قارساڭىندا قاپشاعاي قالاسىندا ەرەسەكتەرگە ارنالعان وڭالتۋ ورتالىعىن اشىپ وتىرمىز. مەملەكەت باسشىسى قاسىم-جومارت كەمەل ۇلى توقايەۆ حالىققا ارناعان جولداۋىندا ەلدىڭ الەۋمەتتىك سالاسىن جاڭعىرتۋ جانە ازاماتتاردىڭ ءال-اۋقاتىن كوتەرۋ مەملەكەتتىك ساياساتتىڭ باستى ماقساتى ەكەنىن اتاپ وتكەن بولاتىن. وسىعان بايلانىستى وبلىستا حالىقتى الەۋمەتتىك قورعاۋ جۇيەسىن ءتيىمدى دامىتۋعا، الەۋمەتتىك-مەديسينالىق قىزمەت قولجەتىمدىلىگى مەن ساپاسىن ارتتىرۋعا بار جاعداي جاسالىپ وتىر. وسى باعىتتاعى ماڭىزدى مىندەتتەردىڭ ءبىرى – ەرەكشە مۇقتاجدىعى بار ادامدارعا قولداۋ كورسەتۋ. بۇگىنگى كۇنى وڭالتۋ قۇرالدارىمەن جانە قىزمەتتەرىمەن 31 مىڭداي ادام نەمەسە 88% قامتىلعان. ءومىردىڭ قيىن جاعدايلارىندا قالعان 3 مىڭنان استام ادامعا الەۋمەتتىك ارنايى قىزمەت كورسەتەتىن 15 مەملەكەتتىك مەكەمە جۇمىس ىستەيدى. سول سياقتى 33 «ينۆاتاكسي» ارنايى اۆتوكولىگى تەگىن قىزمەت كورسەتەدى، – دەپ اتاپ ءوتتى ب.بايجۇمانوۆ.
اشىلعان جاڭا ورتالىقتا ەمدەلۋشىلەرگە ارنالعان 17 بولمە، اكىمشىلىك جانە ەمدەۋ كابينەتتەرى، سونىڭ ىشىندە ماسساج جاساۋ، تۇزدى شاحتا، فيزيوەمدەۋ، 4 لفك كابينەتى جانە باسقالارى بار. سان ءتۇرلى ترەناجەرلار تىرەك-قيمىل اپپاراتتارىن دامىتۋعا، ينسۋلتتان جانە ينفاركتتان كەيىن اعزانى قالپىنا كەلتىرۋ، تىنىس الۋ جۇيەلەرى ورگاندارى اۋرۋلارىنىڭ الدىن الۋعا جانە ولاردان ەمدەۋگە باعىتتالعان. ورتالىقتا كارديولوگ، نيەۆرولوگ، تراۆماتولوگ، ديابەتولوگ، كىشى مەديسينالىق قىزمەتكەر – جالپى سانى 21 مامان جۇمىس ىستەيدى. نەگىزىنەن تىرەك-قيمىل اپپاراتى مەن ءتۇرلى جۇيەلەردى تولىق قالپىنا كەلتىرۋ، سول سياقتى كۇندەلىكتى ءومىر مەن ەڭبەك جاعدايىنا بەيىمدەۋ قىزمەتتەرى كورسەتىلەدى. ورتالىقتا وڭالتۋدان ءوتىپ جاتقان ادامدارعا 4 ۋاقىت تاماق بەرىلەدى. نىساندى ودان ءارى كەڭەيتۋ جوسپارلانعان، ياعني جىلىنا مىڭ ادامعا دەيىن قابىلدايتىن مۇمكىندىك جاسالماق. جوبانىڭ جالپى قۇنى 17 ملن. تەڭگەدەن اسادى.
وسىنداي تاعى ءبىر نىسان قاراتال اۋدانى ۇشتوبە قالاسىندا «قاراتال» كۇندىزگى بولۋ ورتالىعىنىڭ جانىنان 50 ادامعا ارنالىپ اشىلدى.
مەكەمەنى بيىل كۇتىپ ۇستاۋعا بيۋدجەتتەن 123 ملن. تەڭگە ءبولىندى. عيماراتقا اعىمداعى جوندەۋ جۇمىستارى جاسالدى، اۋلاسى اباتتاندىرىلدى، ماتەريالدىق-تەحنيكالىق بازاسى جاڭارتىلدى. مەكەمە زاماناۋي وڭالتۋ قۇرالدارىمەن جابدىقتالعان. ورتالىقتا لوگوپەد، دەفەكتولوگ، پسيحولوگ، مەديسينالىق ماماندار قىزمەت كورسەتەدى.
وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى مارجان مۇراتتىڭ ايتۋىنشا، اۋدانداعى شالعاي اۋىلداردىڭ بالالارى نازاردان تىس قالمايدى. كىشكەنتايلاردىڭ انالارى دا ورتالىقتا بالالارىنىڭ جانىندا بولا الادى.
– كۇندىزگى بولۋ ورتالىعىنا كەلىپ جۇرگەنىمىزگە ءبىراز بولدى. وسى ۋاقىت ارالىعىندا بالامنىڭ دەنساۋلىعىندا وڭالۋ بەلگىلەرى بايقالا باستادى. ورتالىقتى اشۋعا ۇلەس قوسقان ازاماتتاردىڭ بارىنە انالاردىڭ اتىنان راحمەت ايتامىن، – دەدى 6 جاسار ايبەكتىڭ اناسى اسەم قويشىعۇلوۆا.
جالپى بيىلعى جىلى الماتى وبلىسىندا 9 مەديسينالىق-الەۋمەتتىك مەكەمەنىڭ اۋلاسى اباتتاندىرىلدى، كوگالداندىرىلدى، اسفالت جابىنى سالىندى، ۆوركاۋت الاڭدارى ورناتىلدى، فۋتبول الاڭدارى سالىندى. 2 مەديسينالىق-الەۋمەتتىك مەكەمە عيماراتىنا كۇردەلى جوندەۋ جاسالدى، 8 مەكەمەگە بالالاردىڭ بۇلشىق ەت جانە يممۋندى جۇيەلەرىن نىعايتۋعا، تىرەك-قيمىل اپپاراتتارىن دامىتۋعا ارنالعان زاماناۋي وڭالتۋ قۇرال-جابدىقتارى ساتىپ الىندى.
