Jetisýda shekara shebi shegendelip, jańa aýdan quryldy
Aldymen Narynqol aýylynda Raiymbek aýdandyq máslihatynyń sessiiasyna qatysyp, aýdan ákiminiń laýazymyna Jolan Omarovty usyndy. Oblys basshysynyń bul usynysy depýtattar tarapynan biraýyzdan qoldaý tapty.
Kezdesýdi aýdan aktivimen jalǵastyrǵan oblys ákimi A. Batalov kópshilikke aldymen Elbasynyń Raiymbek aýdanyn bólý arqyly jańa aýdan qurý týraly Jarlyǵyn oqyǵanda jergilikti halyq oryndarynan tik turyp qol soǵyp, ózderiniń qýanyshtaryn jasyra almady. Jalpy Qytaimen shekara mańyndaǵy aýdannyń óz alyna jeke aýdan bolýy elimiz úshin strategiialyq mańyzdy másele ekeni belgili.
Jeldiń ótinde, eldiń shetinde turǵan Narynqol aýyly endigi jerde Raiymbek aýdanynyń ortalyǵy bolmaq. Oblys basshysy az ýaqytta aýdandyq mekemeler, halyqqa qyzmet kórsetý oryndary otyratyn ǵimarattar anyqtalyp, jóndelip, retke keltiriletinin, shtattar berilip, jas mamandar tartylatynyn, aýyz sý júiesi men gaz qubyryn tartý da josparlanyp otyrǵanyn aitty. Sonymen qatar aýdan ákiminiń aldyna birqatar mindetter qoidy.
– Memleket basshysynyń saliqaly sheshimi bárimizdi de úlken qýanyshqa keneltti. Jiyrma bir jyldan keiin shekaralyq aimaqta ornalasqan Narynqol aýyly aýdan ortalyǵy bolyp qaita túleitin boldy. Biz óz tarapymyzdan barlyq qoldaýlardy kórsetemiz. Osy óńirden shyqqan biznesmender de bul iske atsalyssa, quba-qup. Qazirdiń ózinde osy aýdanǵa mal bordaqylaý alańdaryn salsam, sút taýarly ferma ashsam, mektep salýǵa járdemdessem dep niettenip jatqan kásipkerler bar. «Búrkit» otyn-energetika kompaniiasynyń direktory L. Botabekova Narynqolǵa kireberis arkany salyp berýge peiil tanytyp otyr. Osyndai eljandy azamattardy kóptep tartý qajet. Irrigatsiialyq júielerdi de retke keltirip, kartop óndirisin damytamyz, oǵan qajetti 2 servistik-daiyndaý ortalyqtaryn quryp, tuqym sepkish, traktor, kartop jinaityn kombain siiaqty qajetti tehnikanyń barlyǵyn alyp beremiz. Fri kartobyn daiyndaityn gollandiialyq «Farm Frites» kompaniiasy investitsiia salyp, oblysta jumys isteitin bolady. Oǵan qosa Almaty qalasynyń kartopqa degen suranysy jylyna 130-140 myń tonna, bizdiń oblystyń tutyný mólsheri de 150 myń tonna shamasynda. Sondyqtan kartoptyń naryqtaǵy suranysyna sai jumys isteý, osyndai aýqymdy isterdiń bárine uiytqy bolyp, uiymdastyrýda aýdan basshylyǵyna zor mindet júkteledi, – dedi A. Batalov.
Osy jiynǵa oblystyq barlyq aýdan, qala ákimderin arnaiy shaqyrǵanyn, Narynqol óńirin kórkeitýge árqaisysy óz úlesterin qosatynyn aitty. Osy jiynda belgili bolǵanyndai, Alakól aýdany munda sport alańy men skver, Taldyqorǵan qalasy krossfit salyp bermek, Qaratal aýdany 1 jarym shaqyrymǵa zamanaýi jaryqtandyrý baǵanalaryn ornatpaqshy. Osylaisha, barlyq aýdan, qalalar Raiymbek aýdanynyń jańa ortalyǵyn abattandyrýǵa atsalysatyn bolady.
Aktiv jiynynda memleket jáne qoǵam qairatkeri, ǵalym, eńbek ardageri Baqyt Ospanov, aýdandyq aqsaqaldar jáne ardagerler alqasynyń tóraǵasy Sabyr Dosymbekov jáne basqa da azamattar sóz alyp, eń aldymen Elbasynyń atyna rizashylyqtaryn jetkizdi. Olardyń sóziniń ortaq túiini:
– Halyqtyń tilegi oryndaldy, kóńili ornyqty, úmiti eselendi, endi tek bilek túre eńbek etýimiz kerek. Bul oraida biz aýdan ákimine qoldaý kórsetip, bastamalaryn birlesip atqarysýǵa daiynbyz, – degen ortaq oiǵa toǵysty.
Aýdan ákimi Jolan Omarov ózine artylyp otyrǵan úmitti aqtaitynyna sendirip, aldaǵy josparlaryn qysqasha baiandady. Máselen, biylǵy jyly kartopty 100 gektarǵa sepse, kelesi jyly onyń kólemin eselep ósirmek. 2020 jylǵa qarai 130 myń tonna kartop jinaý josparlanyp otyr. Budan ózge de áleýmettik-turmystyq jaǵdaidy jaqsartýǵa baǵyttalǵan jobalar barshylyq.
Jiyndy qorytyndylaǵan oblys ákimi qysqa merzimde shekaralyq óńirdi gúldendirýge barlyq qajetti qoldaýlardy kórsetetinin atap ótip, narynqoldyqtardy alda turǵan aýqymdy isterdi birlesip atqarýǵa shaqyrdy.
Sondai-aq, osy kúni jańadan qurylǵan Kegen aýdanynda bolyp, máslihat depýtattarynyń qoldaýymen, Prezident Ákimshiliginiń kelisimimen aýdan ákimine taǵaiyndalǵan Talǵat Baiedilovti aýdan aktivine tanystyryp, óńirdi damytýǵa qatysty birqatar tapsyrmalar berdi. Onyń ishinde kartop ósirý isin, shaǵyn jáne orta kásipkerlikti damytý jáne basqa da salalar bar.
– Aýdandy ekige bólý sharalaryna biýdjetten 2 mlrd. teńge qarastyryldy. Biraq, munyń syrtynda turǵyn úiler qurylysyna, infraqurylymdar júrgizýge, tehnikalyq jabdyqtaýǵa – basqa da osyndai mańyzdy sharalarǵa qosymsha qarjy beremiz. Qatar jatqan eki aýdandy bir-birinen bólmei birdei kómek kórsetemiz. Eki aýdan bir-birine qoldaý kórsetip, jarysa jumys isteidi dep senemin. Kegen aýdanynyń týrizmdi, aýyl sharýashylyǵyn damytýǵa múmkindigi mol. Munda Moinaq GES-i bar. Sondyqtan barlyq áleýetterińizdi tiimdi paidalanyp, ólkeden shyqqan kásipkerlerdi de tarta otyryp, úlken isterdi tyndyrýǵa tiispiz. Búginge deiingi bastalǵan jobalardy jańa ákim sátti jalǵastyryp, onyń jemisin halyq kórýi tiis, – dedi A. Batalov.
Jiynda ardagerler de sóz alyp, Elbasynyń oń sheshimine, igi bastamalarǵa alǵystaryn jetkizdi. Biraz jyldan beri sheshimin kútken «Qumtekei» kanaly úshin 50 mln. teńge bólinip, qalpyna keltirilgenine, kartop óndirisine qatysty jobalardyń bastalǵanyna qýanǵandaryn aitty. Eki aýdan ákimderiniń jumystaryna tabys tilep, batalaryn berdi.
Atap ótsek, jańa ózgeristerge sáikes Raiymbek aýdanyna 11 aýyldyq okrýg jáne 20 eldi meken kirip, aýmaǵy 711,9 myń gektardy qurasa, jańadan qurylǵan Kegen aýdany 710,3 myń gektar aýmaqqa jáne 12 aýyldyq okrýg, 34 eldi mekenge ie boldy.
Baljan QAIRATQYZY,
Almaty oblysy.
